شكل السِّناريو

شكل السِّناريو

بعد كُل العُمر دا
لسَّه ما حسمتوا القضيَّه
اللي داق مُر العِدا
كِيف حــَ يرضىٰ يكون ضحيَّه
اللي قلبُه شال مَراره
مـِـ الغضب صبحِت حجاره
صِيتها عَوَّر عن جداره
ليه يشارك مسرحيَّه ..
هو رافض ذكرُه فيها
من قُريِّب أو بِعيد
أصلُه راسي عــَ اللي بيها
غير شموخُه من العَنيد
حتَّىٰ موتُه عَندُه عادي
كان فـِ حاضر أو فـِ ماضي
فـَ بَديهي ما يبقىٰ راضي
ان يهدي عَدوُّه عيد
راجعوا أمجاد التَّاريخ
راح تِشوفوا فيها عِزَّه
قبل ما يعلىٰ النِّبيح
مـِـ الدِّيابه علىٰ ابن غَزَّه
اللي صار بينكُم وحيد
وان ناصرتوا من بَعيد
كُل يوم شفتوه شهيد
والكرامه فْـ طينكوا غارزه
صَفقِة ايه يا عم قولِّي
قصدي أقول خِطِّة سلام
لا احسَن آخد رَفد كُلِّي ..
وْ شِعري ياخد رَفض تام
والكِّنايه تصير غِوايا
والمجاز يبقىٰ حِكايَه
ماللي بيودُّوا السَّرايا
ولا نِمرَه فـِ اللُمان
كُل خِطَّه وليها صاحِب
مهما بان شكل السِّناريو
ولَّا راوغَك اللي كاتِب
فـِ النِّهايه لُه رسايلوا
واحنا طبعآ مش بحاجه
اننا نُبدي السَّذاجه
وان نِتقنها بلباقه
واللي مِستقوي نجاملُه

شكل السِّناريو
مسعد سليم