بيت الأدباء والشعراء

#قلبك_و_ما_يريدك ..!! ————د خيرى السلكاوى ..

#قلبك_و_ما_يريدك ..!!
————د خيرى السلكاوى
..
الله على كلمتك
واحدة ف أي ظروف
متعطرة ببسمتك
لابسة عباية صوف
متهندمة بطلتك
و مْن الحديد بتشوف
لا عمر طالها ندم
و لاعمر عرفت خوف
و لا عمر ذاعت سر
حافظاه على المكشوف
دى كعبة و مشرفة
فى القعدة ويانا
ف إديها زمزم شفا
تروي العطاشى أمل
وهي عطشانة
و كل حرف انكتب
لازم عليها يطوف
..
ألفين صلا وسلام
على النبى العدنان
و أعوذ برب الناس
م النق و الوسواس
و شر مداري
مالى قلوب الناس
و لكل واحد أصل
و لكل واحد كاس
و الحرف له أصلين
الحبر و الإحساس
واحد من الفضة
بتكتبه اقلامنا
و التانى فصه ماس
مرسوم ف احلامنا
محفوظ ف نن العين
لكل شئ حساس
وقت اللزوم بيبان
بوش مش وشين
لاعمره يوم افترى
ولا عمره يوم اندلس
..
الله على كلمتك
و الحرف من إيدك
عارف طريف سكتك
راسم لتنهيدك
عايز يقول ياهوووو
قلبك و ما يريدك
لا عمره كان عبدك
و لا عمره كان سيدك
و لا عمره بان حزنه
و انت ف هدوم عيدك
إن يوم طفيت شمعتك
مين غيره هايقيدك
و بأعلى صوت تلقاه
ينشد اناشيدك
و ف أي كرشة نفس
تظهر ف تنهيدك
تلقاه ف نسمة هوا
مهموم بتزويدك
بالأكسجين و الدوا
حافظ مواعيدك
و يغني ١٠٠ موال
للحب و يزيدك
و ان يوم سألت سؤال
مبن غيره هايفيدك!
..
قلبك ماتخسرهوش
بحزنك المكتوم
فضفض و قول كلمتك
و اوعى تبات مظلوم
قال الحكيم رواش
أوعى تبيع ببلاش
دا الدنيا ما تسواش
و الصبر لو يوم راح
و غاب كتير و لا جاش
الحزن مش بيدوم
لو عاشله يوم و اتنين
الفرح له ١٠٠ يوم
و اللي معاه ربنا
لو يوم غرق ف البحر
البحر بيه هايعوم
..
قلبك حمام زاجل
بيوصل المكاتيب
بالكاش و بالآجل
ما بين حبيب و حبيب
ما هوش بيتاكل
محشي فريك و زبيب
اكتب خبر عاجل
و زود المشاريب
” حبيبي غاوي فادچ
و شاي معاه بحليب
و قعدة ع الكورنيش
ترهيب مع الترغيب
قلبك و ما يريدك
والصبر فرجه قريب”
..
————قلبك و ما يريدك
——————————-

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: