بيت الأدباء والشعراء

فلاح بلدنا الاصيل

اليوم يناسب ذكرى عيد الفلاح كل عام وهم ونحن بخير
===== فلاح بلدنا الاصيل====
قصيده للشاعر // على عبد الرازق صالح احمد
المعصره // الفتح // اسيوط
ت // 2402204 // 088
==============================
فلاح بلدنا الاصيل ملوش مثيل فى الغرب
واصل ليله نهاره كأنه فى ساعه حرب
الفجر يطلع يقوم يصلي الفرض
ويحمل فاسه فى إيده يهمس يقول يارب
ماشي فــ طريقه متوكل على الرحمن
وهوا ماشي يسبح سبحانك فالق النوى والحب
ولآن طبعه الاصاله والكرم والحب
تلاقيه فى ساعه فرح تلاقيه فى ساعه كرب
حياته كفاح وعرق وجهد متواصل
اصيل وطبعه الجد معرفش فــ حياته اللعب
لاشمس النهار تحرقه ولا برد يأثر فيه
يتحدى كل الظروف يتحدى كل الصعب
تحيه ليك يا ابن بلدي يا ابن الهرم والنيل
لك منا الف تحيه لك من كل الحب
============================
فلاح بلدنا الاصيل راح غيطه وقال موال
ونادى على ابنه الوحيد تعالى يا عبد العال
اقولك كلام يا ولد قالوه فى الامثال
الارض عرض يا ولد بلاش نقاش وجدال
تضرب ارضك بفاسك خيرها يرد عليك
واخر نهارك تروح تنام خلي البال
اقولك نصيحه صريحه مليحه ليك ولآولادك
ارضك حافظ عليها وورثها للاجيال
وخللي عندك عزيمه تهد بيها جبال
وخليك صابر جلد والنيه بالاعمال
واختار صاحبك يصاحبك لوجه الله
اياك تماشي ردي والا خسيس محتال
اختار صبيه مليحه اصيله بنت حلال
تملى عليك دنيتك وتشيل عليك احمال
وان جبتلك ولد يبقى اصيل الخال
وخللي عندك اراده وايمان قوي بالله
تبقى القناعه شعارك كنز بلا اموال
سلح ولادك يا ولد بالعلم والايمان
العلم نور وهدايه وفيه صلاح الحال
حب الوطن يا ولد اسمى معاني الحب
قالها جدي وجدك وغنوها فى الموال
=======================
بقلم // على عبد الرازق صالح احمد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: