بيت الأدباء والشعراء

حروف الكلام **************

حروف الكلام
**************
بحلم ألملم حروف الكلام
واكتب قصيدة ف وصف الغرام
تبقى ف ديوانى رمز المحبه
وان حابة تبقى .. لقلبى السلام
بس اللى عاوزه منك ياروحى
تنسى جروحك
وانسى جروحى
وف حضن قلبك اعرف أنام
بحلم اكون لك فارس همام
واحارب عشانك جيش العذاب
وسهمه اللى خلا قلبك ف وحدة
ورافض يسلم لسن الشباب
ف لحظة هيام
بحلم أكون لك بلسم جروحك
وأمسح دموعك
واقيد لك شموعك
وافتح بجرأة حٍصن الظلام
وادخل حوارى صمت القلوب
وأبدأ أدوب ف دفئ المشاعر
وانسى الألام
وأسأل وريدك
يفتح لحرفى المتيم بحُبك
باب العتاب
واعاتب عيونك
ودمعة بتحرق ورد الخدود
وأفك الطلاسم
من غير مراسم
بتبنى ما بينك
وبين العواطف
أعظم سدود
وافضل ساعات
أحايل وأحايل ف ست البنات
تنسى الهموم وغدر الأهات
واطلب أبات.. جوه العيون
واروى الشفايف بسكر نبات
وأفضل ساعات
أحايل حبيبتى
تحاول تقوم
وتردم بإيدها كل اللى فات
وأحايل هواها
ينسى السُكات
ويبدأ يلاغى قلبى الحزين
بأجمل كلام
يمكن يعود لبيت القصيد
ويكتب ديوان ف وصف الغرام

***********************

رضا أبو الغيط

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق