لو…. لو فتحت لك قلبي

لو….
لو فتحت لك قلبي
وسبتك تقعد فيه
ياترى هتفرحه
ولا هتجني يوم عليه
وتسيبه فى حزن وألم
وأقعد أبكي عليه
ولا هتاخد بالك منه
وأفرح بيك وبيه
لو بقيت سبب سعادته
ساعتها هقدم لك عمري
كمان هِديّة عليه
وزي ماسكنت قلبي
هات قلبك أسكن فيه
وتبقى رفيق عمري
اللي دورت كتير عليه
وأقول ياربي شكرًا
إنك هَاديتني بيه
بعد ما القلب تعب
من المُر اللي فيه
أخيرًا هيشوف الفرح
وأنت كفاية عليه
ربي يخليك ليا
وتحطه جوه عينيك
ولا يفَرّق أبدًا بيننا
ويبارك يارب فيك
وتبقى طول العمر جَنبي
لإني محتاجة ليك
محتاجة لكلمة حلوة
وتشد على إيدي بإيديك
ووَنس في دنيا صعبة
صعب تعيشها لوحديك
وحتي لو عشتها وحدك
بتتحسب من عمر ليك
يبقى ليه تعيشها لوحدك
ما دام اتحسبت عليك
حرام تتحسب علينا
وهي ضايعة من إيدينا
يارب هَوّن علينا
وإسعدنا وقربنا ليك
السعادة منك وحدك
أنت اللى بتكتبها بإيديك
يارب اقبل دعانا
وكل من يدعي إليك
الفرح والهنا نصيبنا
والشكر والحمد ليك
ولكل اللى يتمناها
يارب آمين آمين .
الشاعرة / نورة اسماعيل
15/12/2019