بيت الأدباء والشعراء

الزمن غدار ***********

الزمن غدار
***********
الجو برد
والزمن غدار
والدار حيطانها بترتعش
رغم اندلاع النار
ف مدار سطوح الأمل
والفَرشة والدوار
والفار بياكل هدمتى م الديل
والليل عويل
بيمد ايده ف الليالى السود
يقطف ورود
حلمت تشوف شمس الحياه
متضفرة بنهار
شايل ف كفه الدفا
وشعاع ف حُضنه النور
لجسور بتشكى من بشر بالكوم
غطت جتتها بالورق والصبر
لحظة هجوم آخر جيوش البوم
على خلق عايشة بالسلف والدين
ف سنين بتبنى للضعيف القبر
وكأنى بينهم
ف الحياة ميت تار
الجو برد ..والزمن غدار
والعار عليك
ياللى خنقت الشمس
وحاسبت بكره
ع اللى عمله الأمس
وبنيت بإيدك فوق أملنا جدار
العار عليك
يا اللى ف إيديك الدم
ورسمت جوه القلوب
بدل السعاده الهم
ومنعت حلمى الوحيد
يتهنى بالانوار
ويدوق كاسات الشهد
فى آخر المشوار
العار عليك
وعليك أكيد
بكره الزمان يندار
وتقول بصوت مكسور
ف الحلق بات محشور
الجو برد
والزمن غدار
وإنهار معاه
صوت السلام م الخوف
والجوف
ما لاقى ف الحياه أنهار
تروى اللى باقى من شراقى الريق
والضيق صديق
باع اللى فاضل من بصيص النور
لشيطان بيحلم
يدفعوا له بالدولار

**********************
رضا أبو الغيط

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق