أمنية طارق في العام الجديد
بقلمي / طارق فوزي
==================
قالولي يا طارق نفسك في إيه
قلتلهم قولي لي نفسك في أيه
ولا أيه ولا أيه
مش هقول نفسي يكون عندي مليار جنيه
ولا يتقالي يا باشا ولا يا بيه
أنا نفسي أشوف مصر أم الدنيا
أم الدنيا بجد
نفسي أشوف جبل الانقسام أدام عيني بيتهد
ويرجع تاني ما بيننا الود
نفسي أشوف المصريين راسمين أمل الغد
ويبنوا مجد مصر يداً بيد
مش هو دا برضو الشعب اللي بنى السد
وهو ده الشعب اللي وقت الجد
ما يهمه أبداً ابداً حد
============
طب ليه نخلي الخوف يسودنا
وإحنا عليه أبداً ما أتعودنا
رغم قسوة الزمان
حتى لو خلص وقودنا
ورغم الكرابيج اللي على جلودنا
عمرنا أبداً ما نحنى عودنا
إحنا شعب إتخلق واحد
وكلنا بنعبد رب واحد
ومفيش بينا انسان لاحد
واللي يقول غير كده جاحد
******
نفسي أشوف لوز القطن
تاني في غيطانه
والمصانع تجري عليه
تغزل خيطانه
نفسي تاني أرجع أسمع
فين المصري فين أقطانه
ويرجع القطن تاني لأقتصادنا
هو سفينته وقبطانه
*************************
نفسي سنابل قمح يوسف
ترجع تاني تطول السما
بعد سنين عجاف طويلة
معرفش تطلع كام سنة
إزاى بس المصري يجوع
وخزائن الأرض في مصر هنا
ارجع تاني يا قمح لينا
ده مسقط راسك عندنا
***********
نفسي أشوف ابني في مدرسته
يتعلم العلم ويا الإيمان
والمناهج كل همها
يتبني فيها الإنسان
نفسي يكون التعليم تعليم معامل
والعلم ويا الإيمان
وبالأخلاق ازاى يتعامل
زي ماوصت الاديان
************************
نفسي أشوف العافية والشفا في مريضك
وينقلوا له دم الحنان والحب من وريدك
ولا أشوف أبداً مريض في ريفك أوصعيدك
