حفله وعزومه وزفه

حفله وعزومه وزفه
وعروسه بوش بلاستيك
وعريس تايه فى الغربه
وراجع شايب بس نعسان
طبله ورق وزماره
وصفارة انذار واذان
وعيون فرحانه وسهرانه
ووشوش بتمثل فى البلاتوه
غمزه وهمسه ولمزه
وشفايف ولسان بيطرقع وودان
ضحكه مصطنعه ومط شفايف
رقاصه بلبس النمر بتتلوى
فرقتها شبهه ولابسهم جن
وانا وحدى بضايف كل الناس
وبرص كراسى وبهنى واواسى
وبسلم عل القاعد
واشاور للماشى
واطنش السكران
وبقدم لصحابى صينية فته
وبفصل للنونو بفته
وبغزل بكلامى فستان
لحبيبتى تلبسه ساعة روقان
وببوس ايد الحاجه
ام الناس والحته
وبقشر احلامى ويا الحمص
وبوزع منهم زى المزه
وبدهن صبرى بمراره
واواسى نفسى على الغربه
وانقش عل الحيط احلامى
وازوق ايامى بضحكه
وارسم طبله واعزف ناى
وارقص يجلابيه وجاكته
واتخيل نفسى سلطان
واطلع من المولد عريان
واتجمل والبس تاج
واصحى من نومى
كتكوت مبهوت غرقان
دى مجرد حالة توهان…..
محمد العليمى