طب قولي اعمل ايه

طب قولي أعمل إيه؟
والعشق كل ده ليه؟
تعبتني نبض وآلام جوه الضلوع
وطريق طويل من غير رجوع
ومشيته وياك بالدموع
هوه أنا كل ما أرجعك
وتقول خلاص هنسى اللي راح
ترجع وتفتح لي الجراح
وتحن للي ودعك
طب قولي أعمل إيه؟
والعشق كل ده ليه؟
………
بتفكرك كلمة رقيقة وتأسرك
وتحركك نسمة ربيع
حتى ولو كان في الشتا
وبتسحرك وتحيرك
وترجعك تاني على الماضي البعيد
وتحرك الشوق من جديد
وتكون سعيد
وإنت بتفتح دفترك
لو تلقى وردة منها
دبلت وفيها عطرها
أو لو جواب وإنت نسيته من زمن
حتة قصاصة من ورق
مكتوب عليها إسمها
وتاخدني تاني للخيال
وبتعشق الشئ المحال
جواك حنين قد الجبال
رغم السنين اللي مضت من بعدها
عشرين سنة واكتر
ما شوفتش ضيها
لسه إنت فاكر كل كلمة منها
أو كل كلمة قلتها
وكل همسة وكل لمسة من إديها
وكل نظرة من عنيها
وكل ما أشوف واحدة جميلة تحسها
وتحبها.. وكأنها هي حبيبتك من زمن
طب مين هيتحمل كده
تعبتني بين ده وده
طب قولي أعمل إيه؟
والعشق كل ده ليه؟