بيت الأدباء والشعراء

متمرد جدا دي حقيقه

مُتمرِّد جدَّا دي حقيقه
وبراهن دايما عــَ الاحساس
لانا صاحب خطوه ولا طريقه
ولا بهوىٰ حتَّىٰ أقول ألغاز
الكلمه بأقولها ومن قلبي
وبجاهر بيها انا وقلمي
وان قالوا بلاش يبقىٰ تحدي
وكأن بتعند بيها الرَّاس
مع ان بيبقىٰ كتير غيرها
جوَّايا موزونه بشكل مُخيف
مُبهره للغير من تفاصيلها
لكن عناد الحرف عنيف
وكأنُّه بيرفُض للمضمون
هاوي شطراتُه يصيبها جنون
مزاجُه المعنىٰ يكون موزون
لو حتَّىٰ هيمشي علىٰ الطراطيف
دي حكايه غريبه وليها ناسها
فهماها وحاسَّه بشعوري
بتعتق من شعرها كاسها
وتقول لحروفها قومي ثوري
مشغوله بمعنىٰ عميق جدَّا
جوَّاها فجرُه داير يدَّن
بتعبَّر عنُّه فـَ تتسلطن
من شرع حروفهم دستوري
أصلها أذاوق وأراء ورؤىٰ
والكُل لُه قلب بيستفتاه
والكُل خيارُه فْـ عينُه تُقىٰ
وبيعلن إنُّه بحرفُه معاه
فـَ سيبونا نعبَّر عن افكار
ربما شايله لنا فْـ إيدها نهار
وان كيفكوا تكونوا فْـ يوم ثوَّار
ثوروا علىٰ ذنب ساحبنا وراه
أو ثوروا علىٰ أخلاق هشَّه
وبلاها حكاية وزن وطول
الحرف الصَّادق مُش كارثه
فـِ القلب وليه اكبر محصول
وما دام المعنىٰ مع الاحساس
اتَّفقوا سوا وقاموا الاعراس
واكتمل العُرس طباق وجناس
ما نسيب الحرفِ فْـ بحرُه يعوم

مُتمرِّد جدَّا
مسعد سليم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق