بيت الأدباء والشعراء

يا ريت ترجع

بقلمي/ محمد ربيع المصري

هتفضل نظرتي ليها
أكيد ثابتة ما تتغيرش
ومهما تطول سنين عمري
هتفضل أمي في عمري
حناااان دايم ما يتعوضش
صحيح رحلت بقالها سنين
وسابتني على رجلي أنا واقف
صحيح راجل كبير وعظيم
لكن من غيرها والله بقيت خايف
أكيد خايف ،،،
لأن الدهر طبعه عنيد ما بيهزرش
ومن صِغري ،،،
فتحت عيوني على طيبة ما فيش منها
وحنية وتربية وأفعال حلوة توزنها
دلع ماشي لكن بميزان
وكل أمان في حضن صريح بيعلنها
دا أنا فاكر زمان مرضي وأنا صغير
ونظراتك كتير ليا
وفيها دموع على الخدين
لسان حالك يقول بأنين
يا ريتني أكون أنا مكانه
ويرجع ولدي تاني سليم
ويوم ما نجحت مش ناسي
يا أمي ضمتك ليا
وزغروطة مدوية
وبوسة طويلة على الجبين
ورقصة معاها أغنية
ومين ينسى وكيف أنسى ؟
وحتى جوازي كان ليكي أكيد بصمة
وقولتي يا واد أنقيلك
فقلت تمااام
اخترتيلي بنت أصول
ومن غير حتى ما اشوفها
وافقت عليها كده على طول
اصلك إنتي يا غالية
نقاوتك زين
ما فيش منك يا غالية اتنين
وطلعت تشبهك يا امه
ولما تعبتي يا غالية
عيوني ما عادتشي تشوف
ضعف بصري وهان عمري
ومرت م السنين دي كتير
وأنا عاجز وحيلي قليل
يا ريت ينفع أنا أديلك
عمر يا غالية من عمري
لكن ما نفعش
وشفتك أنتي قدامي
بنظرة حزينة فيها حنين
تقولي خلاص أنا مسافرة
وسفري طويل
بس يا واد أنا راضية أكيد عنك
فيا ولدي بقى أدعيلي
وبقيت أنا وحداااني
ولو حواليا كل الناس
هقولك عاوزك تعودي تاني
ولو كان ليا أمنية
هقول للدهر يا زماني
رجع لي قوام أمي
ما تتأخرش ،،،
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: