وحدة
…….
امبارح..
مش فاكر
جايز يمكن من كام يوم
زي عوايدي صحيت م النوم
استغربت..
لما لقيت الشمس بتقدح ف البدروم
يعني أنا نمت لحد الضهر ؟!
لأ والفجر الست حرمنا لسّاها نايمة
قومي يا ولية يحشك قطر
غراب الآخرة قرّب يدّن
وأنا ما فطرتش
واللا اكمني طلعت معاش هتسوقي فيها
بنتك نوسة الله يخليها
فاكره يا حاجة
كانت دايماً بتصحينا
مرة ببوسة وكمان بوسة
ومرة يا بابا الفجر بيدن
قوم اتوضى وصلّي الفجر
وابقى ادعيلي
وكنت ادعلها يجي عدلها
لحد الباب
واللا الواد اللي اسمه مهاب
ابنك يعني
فاكره يا حاجة لما ف وشه طلعله شناب
كنت باقول لك
كبر الواد واهو دلوقتي
يبقى نواية وتسند زير
وانتي تقولي يا عبده ادعيله
ينفخ صورته ويبقى وزير
وكنت ادعيله
وفضلت أدعي لحد ما غاب
شده البحر
قومي يا وليه…
مش معقول من كام سنة نايمة
وسايبني وحدي
شوفيلك حل
يا أما تمدي وتاخدي بيدي اتونّس بيكي
يا أما تشدّي غطايا عليا
ونظرة عينك بتقول ليا
لسه الفجر آوانه ما جاش.