بيت الأدباء والشعراء

#سجال_الفطاحل .. من غير غرور …!!

-د. خيري السلكاوي

 

#سجال_الفطاحل ..

من غير غرور …!!
————-د. خيري السلكاوي
..
لما النهار يدارى في عيون الشقا
والليل يكبل خطوتك ..
وسط الزحام
..
اعرف بإن اللي بيقرب لأغصانك لقا
والعش راح يرجع ..
يعيش فيه الحمام
..
اصل الطيور ..
مهما الغصون مالت بها
هاتلاقي مأوى غيرها فين..
حب و سلام
..
و الدمعة لو ضاقت…
بشكوتها العيون
تروي على خدود الأمل ..
ضلمة بنور
..
وكل آه مهما علت …
فيها تهون
تغسل تقاسيم الوجع ..
تزرع زهور
..
فمترتميش ..
في حضن اسراب الغراب
وتقول نصيبي وقسمتي ..
هجر وعذاب
..
لو باب لقيته بيتقفل…
قدام عنيك
دور تلاقي بينفتحلك ..
الف باب
..
خليك ندى ف الصبح…
للأرض الشراقي
تطرح وشوش الورد منها ..
حب راقي
..
متعتقة فيه العطور ..
ولا اي نظرة منه بور
بنظرة واحدة منه تعبر …
أي سور
..
و تعيش ملك …
من غير غرور بين النسور
تنسج لنسرايتك بروحك…
بيت ملوكي
..
تكتبلها …
وتفك شفرة حرفها …
بين السطور
وتطير بها ملكة على ..
جناحات شروكي
..
ماهي النسور كدة حبها
دايما بتبقى …
ناره قايدة ف قلبها
..
أفرد جناحاتك…
ويلا روح لها
العشق إيه ..
غير نسر بيدوب في الحبيبة
ينسى انه بين كل الطيور..
له الف هيبة
لكن حبيبته دي انخلق …
من اجلها
..
افرد جناحاتك …
ويلا روح لها
وقوووول لها ….
..
مش بردو لينا ف الغرام..
اجمل حكاية
من يوم ما حط الصقر ..
فوق رايتك وطار بيكي ف سمايا
و قريت كتاب الله لقيتك ..
جوا منه احلى اية
حسيت بإن الكون بحاله…
كان معايا
يوم ماتنصب في دنشواي…
ظلم احتلالهم مشنقة
واستفردوا …
بعرابي ف التل الكبير
مابين اذى السندان ..
وخبث المطرقة
ناسيين بأن الصقر لما بيتزنق ….
بيطير لفوق
مهما اتنصب ..
حوالينه طوق
..
و يعود يرفرف من جديد
لجلن تعود كل الحقوق
لجلن تعود كل الحقوق …
..
وللحديث بقية ….!
..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: