بيت الأدباء والشعراء

* فضفضه *

عمل مشترك ... للشاعره / حنان حلمي والشاعر / محمود فاروق النجار

 

* فضفضه *

عمل مشترك …
للشاعره / حنان حلمي
والشاعر / محمود فاروق النجار
… …

الحب سلعه نادرة الوجود
كان زمان الحب مالوش حدود
وكان في وصل مابين القلوب ممدود
كانت دواوين الحب تخلد المحبوب
..هو..
وكان في كمان
امان وحنان
وطيبه
زمان لما كان
همزه الوصل موجوده
بين قلبين
حاسين الحنين
من غير ما السنين
تبدل ما فيهم
وتبني السدود
……هي…..
يمكن راح زمن الطيبين
يمكن مبقناش فاضين
علي لقمة العيش دايخين
يمكن في الحياه تايهين
.. هو..
ممكن
بس اللي مش ممكن
اننا نسيب الحياه
تاخد مننا
ولما نطلب ف يوم منها
متديش
وتقول مفيش
كان زمان
اصل الحنان مبيتشريش
…هي..
هي الحياه كده تاخد ومتتديش
ولما تطلب منها تقول معنديش
الي يعرف الدنيا وراها ميجريش
…هو..
والله ما جريت
والا عمري طلبت
كان كل همي
حضن دافي
وقلب وافي
وحب ياخدني لبعيد
والدنيا تسبني اعيش
…..هي..
كلنا كنا للحب مشتاقين
ابسط أمانينا نكون مدفين
بالحب الوافي المتين
الدرع الواقي الامين
ابسط أمانينا نكون متامنين
بحب ولا حب العاشقين
…هو…
ياه علي دنيا العاشقين
لما كنا بنسمع اغانيهم
دقات قلوبنا علي طول تاخدنا للحنين
ونقول مشتاقين
وفين راحو
وفين راحت امانيهم
ومعاهم ضاعت سنين
..هي..
اه من السنين بتفرقنا وتبعدنا عن حبايبنا
لكن ولا مره نسيناهم هم جوه قلوبنا
ولا جفا ولا بعد ولا موت هيبعدنا
هم ساكنيين جوه جوه ارواحنا
….هو..
ما هي اروحنا كمان
خدوها واياهم
وعلمونا الجفا
وما قدرنا ننساهم
وسابونا وسط الطريق
يتوهء بينا
وحتي ضي الصبر فينا انطفا
….هي
الصبر فينا عمره ما انطفا
حتي لو عاملونا بكل جفا
اكيد سهم الحب صابنا
والألم لينا كان نصيبنا
ولو الحياه بعدهم فارقتنا
هيفضلوا لينا احلي ذكري
….هو..
ياااااه
علي قلبك الطيب
هو انتا لسه عايش ليهم
علي ذكري
ده احنا بالعافيه
بنحاول نعيش بكره
وبننسا معاه امبارح
واللي كان قريب
ده انتا بس
عشان قلبك لسه طيب
حاول يا قلب تنسا
وبلاش تعيش امبارح
وعيش اللي جاي بكره
…..هي…
لو ننسي امبارح مش نفتكر بكرا
والذكري حتي لو قاسيه برضو ذكري
اه قلبي طيب بيسامح ويفتكر بكرا
علشان اعيش في الدنيا علشان بكرا
بكره مش ملكي انا بكره ملك اولادنا
ليه تصعب ونلخبط ايامنا وحياتنا
لازم نعيش ويكون عندنا امل في بكرا
…هو…..
حتي الامل
اسمه امل
بنعيشه حلم
من غير امل
بدر وبنشوفه
ف السما عالي اكتمل
ليله اتنين تلاته
وبيضيع وسط سحابه ملل.
…..هي
الامل دايما فينا مولود
بدر بيتولد هلال ثم بدر ثم يخبو ثم يعود
الملل لو صابك مرض مالوش حدود
اوعي في يوم تفوت الامل حتي
لو حلم في خيالنا هو بردو موجود …….

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: