بيت الأدباء والشعراء
بيقولوا مات
((( بيقولوا مات )))
*************
رغم ان زرعه
كان مِنَـبّـت فى النجوم
كان بيرويه من ضيّ القمر
مات من قبل ما يفرح
حتى بخبر
مات ولسه صوته
ساكن أوراق الشجر
مات ولسه بموت ولو هيموت
كل يوم ألف مره
هيتولد زيّ حبات المطر
بيقولوا مات
*******
مات والحلم لسه جواه
أعلى من أعلى جبل
حتى لو مات كل يوم
هيعيش الأمل
بيقولوا مات
*******
مات جوه صدر
مشنوقه فيه الآهات
مات م الكلام
من زحمة الأيام
مات
م السكات
ملعون أبوك ياموت
يا اللى ساكن جوه جدران البيوت
حان الميعاد نعلن حقيقه ؟
ولا نلتزم السكوت ؟
يا كل الخلايق
ياغصن الزيتون فى بق الحمامه
يا كل أنواع الورود
يا نخل التوت
القلب لسه موجود ؟
ولا محبوس جوه موت ؟
بيقولوا مات
******
مات
وجسمه رافض الكفن
رافض يغادر الوطن
رغم انه تايه جوه نفسه
بين جدرانك يازمن
رغم انه شارب كل كاسات المحن
بيقولوا مات ورافض يدخل الكفن
جايز عشان مرسوم على صدر الكفن
نجمه وصليب
ولا جايز مات عشان
بُـعد الحبيب
واحتمال انه مات
لمّـا حس انه غريب
بيقولوا مات من سنين
الغريب انه كان انسان رزين
انسان حزين
انسان سكوته زيّ صوته
زيّ همس الميّـتين
رغم انه ميّـت من سنين
لسه ابتسامته مرسومه فى كل عين
بيقولوا مات
********
شاعر القريه
فيصل بدر
