حاسس. ان. الروح. بتبكي

حاسس ان الرُّوح بتبكي
مُرهقَه من حُزن زايد
مـِـ الوجع مش قادره تحكي
والشَّجن جوَّاها فايض
فاقدَه الفرح والأمنيات
وسط الضجيج حاسَّه بسكات
مقفول عليها ذكريات
وبتدفع الدَّمعات ضرايب
إحساس غريب صعب الدَّوا
انَّك تعاني جوَّه روحك
وتحس قلبك انكوىٰ
موجوع ما بين صمتك وبوحك
جوَّاك أحاسيس صعبه حقيقه
بتئن الرُّوح كُل دقيقه
وسط الاوجاع صايره غريقه
وفـِّ الخروج منها طِموحك
بتعافر لجل تطول الحلم
والسِّكَّه بعيده ومش سهله
رغم ان الخطوه ماليها السِّلم
بتجدد مـِـ الصَّبر المُهله
عشمان البسمه تدُق الباب
والقلب بياخُد بالاسباب
ودفع من صبرُه أعلىٰ حساب
وعيونُه عليك لسَّاها ساهرَه
بتراقب فرحه تيجي تضُمَّك
وتداوي سنين عشتها فـِ شتات
والحُزن ما عاد تاني يؤمَّك
وكأن جراحك كات لُه طاعات
مُشتاق لشعور يِفرِح قلبك
ويشيل عن ضهرُه سنين تعبك
والفرح يجيك ويكون صاحبك
والرُّوح يمسح عنها الدَّمعات
قادر يداويك من أي عذاب
لكنُّه نصيب وقدر مكتوب
من غيرُه ليك اقرب أحباب
بيحسَّك غالب أو مغلوب
فـَ ارضىٰ بقضاؤه وأحكامُه
سبحانُه ربي عظيم شانُه
وكِّلها عليه تلقىٰ أمانُه
راح يجبُر روحك كما أيُّوب

أنين الروح
مسعد سليم