بيت الأدباء والشعراء

قصيدة بعنوان (آه يا صبر أيوب)

شاعر العاميه نبض الصعيد الجواني خليفه الابنودي أدهم السمهودي

 

قولي ياعم أيوب
مش صبرك كيف صبرنا
داحنا ياعم يدوب
يومين ويخلص مننا
هو العيب في القلوب
ولا العيب في صبرنا

هو زمنا غير زمنك
ولا احنا زمنا قاسي
قولي يا صبر كام تمنك
لاشتريك بشاشي
واوزعك ع اللي اتحرمك
وافرّح بيك ناسي

آه يا صبر أيوب
لو كان منك تقاوي
لنخزنك حبوب
واتصبرنا ع البلاوي
دا قبل ياعم ما نفوق
تتجدد تاني البلاوي

لازرع منك فدادين
واخزنك في الصوامع
واوزعك ع البنى ادمين
واعمل منك بضايع
من كتر الحمول مش قادرين
على الصبر لو دقايق

اللي طهقان من مرضه
من كتر سهر الليالي
مش طايق حتى خلقه
ولا طايق يعيش تاني
ونسي ربه اللي خلقه
ونسي رجوعه تاني

واللي قهران من الفقر
ونسي الرزق على الله
كأنه مدفون في قبر
عيشه عايشها ويالا
نسي الخواطر لها جبر
وكله بيد الله

وآه يا صبر أيوب
م تقولي فين الاقيك
ل أصرف عليك الجيوب
والغالي يرخص ليك
وتصبرنا ع المكتوب
فين ياعم الاقيك

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: