دي صورة لاولادنا
لاجل نداري وجِعِنا
ويطمنوا علي أحوالنا
آه لو تشوفنا ف شغلنا
يصعب عليكم حالنا
دا الهم كيف لبسنا
مخلوط بجلبابنا
والحزن بايت في حضننا
والدمع سايل ع اخدادنا
والشقا فينا من صغرنا
موروث عن أجدادنا
لاجل نحلل قرشنا
ويبارك ف عيالنا
ويطيب بيه بيتنا
ويعم فيه حلالنا
لو تحسوا ببعدنا
لو تعيشوا أحوالنا
هتقولوا كتير عننا
ويتصعب عليكم حالنا
مين يقدر على حِملنا
مين يشيل جبالنا
يارب يا عالم بنا
خفف عننا احمالنا
يا كاتب الشقا على كتفنا
احمينا من حسادنا
يا راسم الهم على وشنا
متشمت فينا عزالنا
شاعر العاميه
نبض الصعيد الجواني
خليفه الابنودي
أدهم السمهودي
