بيت الأدباء والشعراء
لجل ما في عنيك عاطف. سالم
@ لجل ما في عنيكِ @
لجل ما في عنيكِ
بقيه….
من اللي فات
علي جبينك بتضوي
صفحة الحب
الاخيره من كتاب الذكريات
لسه ياسمينك مامتش
والولد شايل في قلبه
لجل خاطرك
قصه لسه ما انتهتش
أغسلي بشعرك ضلام الليل
وهاتي الصبح
من الأول نعيده
لجل ما القمر اللي ساكن
في الخريف علي الشجر
يكمل نشيده
لو عرفتي إني بحبك
قد كل الرمل الأصفر
علي المواني والصحاري والشطوط
لو عرفتي إني بحبك
قد دقات قلبي وأنفاسي
من يوم ما أتولدت
ولغاية ما أموت
لوعرفتي كنتِ وفرتي الليالي
وأفكارنا وإنتظارنا للسنين
كنتِ خليتي الليالي
تخلف الف ليله
وليله تانيه
وشمس تانيه
وصبح تاني
فوق نهارنا
هاتي نياتك وأضحكي
وغني وخلي
صوت الضحك يسرح في الفضا
خلي ضحكتنا
تهاجر السكات
اللي إنغرس فوق صدرنا
منا أصلي حبيتك بجد
وانت في عنيكِ الحنين
لجل ما في عنيكِ
بقيه من اللي فات
علي جبينك بتضوي
صفحة الحب الأخيره
من كتاب الذكريات
لجل ما في عنيكِ
عاطف سالم محمود نصر
