بيت الأدباء والشعراء

تحياتي

بقلم اسماعيل البلبوشي

قصيدة بعنوان /تحياتي
بقدم تحياتي
لكل اللي صان العشرة وما خانش
ولكل اللي زاد عليه الحمل وما مالش
وللعالم الأونطة شافوني ف ورطة
فعملوا خطة وأنا قلبي منهم ما شاللش
………………
و بقدم تحياتي
لأي حد جدع طيب ساب أثر طيب فحياتي
ولأى حد بسببه قلبي أتكسر وبدأت معاناتي
وشفت الغلب وما لاقيتش سند ولا حب
ولأى حد كان فيوم سبب دموعي وأهاتي
……………….
بقدم تحياتي وبقول له شكرا
أتعلمت منه بجد أكون قوي و صعب
وزادت محاولاتي. فعز الأزمة أقف صلب
ولا أتهز مهما اشوف فحياتي واقف ثابت
مهما الدنيا تجي عليا وأحزانها فقلبي تصب
…………………
بقدم كامل تحياتي
لكل الناس التعبانة المجاريح
لاى حد وقف صامد قصاد الريح
وماكانش ضعيف وقفل بابه
برغم عذابه كمل وكان صابر وصريح
…………………..
بقدم تحياتي
لكل الناس اللي حبيتهم من كل قلبي
وكان حبي خالص لوجه الله. فكان ذنبي
أشوف خذلان وأعيش معاناه وأشوف تجريح
طبع الناس النكران فده كان جزاء تعبي
بقدم تحياتي لابويا
الراجل الطيب اللي بالحلال ربنا
تعب عشانا وشقي سنين. رجاله خلانا
نسد عين الشمس ونزغلل عين الحساد
فكنا شداد بحصاد رضاه وهو معانا
………………
بقدم خالص تحياتي
لمراتي وأم عيالي وروح الروح
الأصيلة اللي منها الكرم بيفوح
من بيت محترم وبنت أصول
فسبيل حبها الغالي يغور ويروح
والخير على قدمها دايما أتي
مولاتي أنا من غيرك كلي جروح
………………….
بقدم تحياتي
لقلبي الصابر اللي أتحمل كتير صدمات
وقف شامخ وما أشتكش وجع الضربات
ولا قالش فمرة أه يا خلق كفاية
خايف يكون قلبي من كتر الوجع مات
بقدم تحياتي لنفسي القوية وبشكرها
وبفكرها بكره الفرج أتي
وهتفضل يا حزن سجين ويفصلنا سور
وساعات مسرور وحر زي حالاتي
كلمات وأشعار إسماعيل البلبوشى

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: