كتابي وشبابي

كتابي وشبابي
بقلم / طارق فوزي
==============================
من الجلدة للجلدة حفظت أنا كتابي
ومن الجيل ده للجيل ده … احتفظت بكل شبابي
كتابي صفحاته عدت مليون سطر
وشبابي سنينه كانت أسرع من 100 قطر
كتابي سطوره مكنتش كلها أحزان
وشبابي كل أيامه مكنتش كلها أمان
قريت في كتابي حروف مكسورة
وشبابي لغز بمليون فزورة
كتابي حكالي من يوم ميلادي لدلوقتي
شبابي كان لعمري كل وقودي وطاقتي
في كتابي شوفت علم وطني مرسوم
في شبابي كنت بظروف بلدي مهموم
في كتابي عرفت إن السيادة .. مش بس قوة
والشاب لأجل يكون سيد .. مش لازم يكون فتوة
في كتابي صفحات شوفت فيها .. هزيمة وإنتصار
في شبابي اتعلمت منها إني .. أقوم بعد إنكسار
كتابي .. كلماته محفورة في السطور
وشبابي .. عمره ما عشت فيه أبداً مغرور
سطور الفرح في الدنيا .. عمرها ما كملت كتاب
وأيام العمر معدودة .. مهما كان الإنسان شباب
من الجلدة للجلدة .. صفحات الأمل فيها كانت قليلة
ومن الجيل ده للجيل ده .. كتير من الناس قليلة الحيلة
من الجلدة للجلدة … حفظت أنا كتابي
ومن الجيل ده للجيل ده … احتفظت بكل شبابي