الشاعر الغنائي ابراهيم دعبس #فانية

الشاعر الغنائي ابراهيم دعبس

#فانية

انا احسن واحد ف الشعرا يفرقع بلالين
اشتم الباشا انا عادي و اجعصها تخين
دي الكلمة رسالة و امانة و المولي خبير
عالم بيخصص مين منا لرسالته امين

اللعنة لكل شيطان اخرص شغال طبال
بيبيع الاخرة قصاد دنيا و صحبة اندال
مين يعقد صفقة علي دينه طبعا خسران
بيسيب الحق من جهله و طريقه شمال

قارون وهامان فين هما و فين النمرود
تراب يدهوس بالجزمة ويتمني يعود
يعود للدنيا يوم واحد عن ذنبه يتوب
دا حتي الكرش ال اكلنا بقي اكل الدود

من جاله فرصة وضيعها طبعا خسران
دي الدنيا غازية طلقها و انت الكسبان
يا ويل مفتون بزينتها وفاكرها تدوم
يفضل نايم علي ودنه يصحي ف اكفان

الحق نفسك دلوقتي دا الموت خطاف
بيخطف منا علي غفلة وحشين ولطاف
والبطن المغرم تملاها باطيبها لحوم
القانع برضو بيملاها ب لقمة و حاف

دلوقتي الدنيا مكشوفة والكل بصير
ونهاية السكة معروفة و اصغرنا خبير
والظالم عارف والفاسد لكن حسابات
والزراع شر متاكد حصده مش خير

عجيبة الدنيا دي وناسها واعجب حواديت
بتموت الناس الغلبانة و ملوك طواغيت
والكل بيخرج متغصب ملفوف بقماش
وتسيب المنصب وفلوسك والناس والبيت
#الشاعر_ابراهيم_دعبس