مين اللى بيخبط
أنا اللى مش جوا
متقولش بستعبط
عنوانى مش هوا
سامعه ومش هفتح
ومش هرد كمان
وقتى ما عاد يسمح
مبقيتش زى زمان
إستنيتك ياما
وزوقتلك وشى
كلمتنى بأياما
وقلتلى إمشى
وياما حايلتك
ونبحت صوتى عليك
ويوم ما قابلتك
ناقص ابوس رجليك
فاكرنى وللا نسيت
إوعى تقول ناسى
هملتنى ومشيت
وجرحت إحساسى
ياسلام عليك يا سلام
تاخد ومبتديش
مش بردو يبقى حرام
أموت انا وتعيش
قلبى معنتش فيه
وخلاص نسيك وارتاح
وسك بابو عليه
وضيع المفتاح
مين اللى بيخبط
أنا اللى مش جوا
متقولش بستعبط
عنوانى مش هوا
منير خاطر
