بلياتشو

بلياتشو

بقلمى
أيمن أبو الدنيا

سيرك ومنصوب يا تكون بلياتشو
فى زمن مقلوب
تتشقلب تتلون تخدع نفسك
واتقول غالب وانت المغلوب
وتضحك ناس
وبقلبك شايل حمل هموم
واتغالط نفسك
واتعوم
على عومهم ….. عوم
وانت من الضحكة محروم
بلياتشو
علشان تعجب ناس مش ناس
من غير إحساس
فى زمن بتموت الناس م الجوع
مجبور تضحك
والقلب بحزنك موجوع
بلياتشو
والكل بيتنطط حواليك
عجب عجب
جلا جلا
ساحر دجال … ومنافق ومرابى
وبهلوان
أشكال تجيب للعقل جنان
غثيان غثيان
وحرام لو قلنا طباع حيوان
ما هو فيه حيوان مليان بحنان
عايش بأمان
بيحب الخير
ولا يأذى الغير
ولا عمره اغتاب فى بدن حيوان
فعلا حيوان ……
وساعات بيكون أحسن بكتير
فى صفاته كمان
من ميت إنسان
فحرام لو قلنا لأى جبان خاين
حيوان
بلياتشو
ولو عمره فى يوم يبكى
وان كان يتألم م الأحزان
محروم م الدمع وم الأشجان
من جوه دموعه بتنزل سيل
والقلب حزين
لكن مجبور يرسم على وشه
ضحكة وألوان
ويوزع على كل الناس
فدادين بسمات
ولا يعرف يوم معنى لسكات
بلياتشو
لو يبكى يقول دى م الفرحة
والناس تضحك من دمع عيونه
ما هو فيه ناس
شكل ومنظر
جواهم أندال مش ناس
احساسهم مات وحياتهم بس
خد هات
سيرك ومنصوب
ولصوص حواليك فى توب أمراء
شرفاء عظماء
حقيقتهم أوغاد جبناء
يسرقوا حتى الأموات
والناس تناديهم باشاوات
أصلا مش ناس
دى وشوش عيرة
قشرة من بره ما ليها ثبات
عايشين على نصب وخيانات
يطربهم مدح البهوات
والواطى بيدق صاجات !!!!
بهلوانات
سيرك ومنصوب
وهموم بالكوم
يا تكون بلياتشو
وتتشقلب واتضحك طوب الأرض عليك
يا تعيش إنسان حر وشريف
بالعفة تعيش
وان كلت فى يومك كله رغيف
أو حتى تموت م الجوع ما تعيش
لكن عايش بكرامة
وعفة نفس إنسان
فارس ونبيل
شارى ولا عمرك يوم بايع
وان كان في زماننا فيه ألوف
عايشين على رقص دفوف
وان عاب الناس على فعل خسيس !!!
بيدافع عنهم مئات وألوف !!!!
اثبت فى زمان مجنون مهفوف
وان عشت بعيد عن كل السيرك
ولا كان ليك دور
دور على نفسك جواك
هتلاقى الخير هتلاقى الصدق
ربك وياك
عالم بهواك
ودع ألعابهم عيش انسان
واضح وصريح
ما تطاطى فى يوم ابدا للظلم
حافظ على نفسك م الأوغاد
كل لقمة عيش مغموسة
بنور الحلم
مغموسة بعرق كفاحك
بحلال مش نصب وزور
اوعى تكون بلياتشو فى يوم
اوعى تكون بلياتشو فى يوم
كسر خشب المسرح فوقهم
وارحل عن كل الملاعين
اوعى تفكر تاخد دورك
وسط السيرك
ودع الاعيبهم وخداعهم
وأوعى تفكر يوم تجاريهم
بكره تكون نهايتهم
جوه السيرك !!!