كفر. صقر

قصيدة بعنوان…… كفر صقر إير….. فكاهية

فى بلدنا عملنا مطار
وبقينا خلاص بنطير
والناس مبسوطه وهايصة
فرحانة ب التغيير
………………..
عوضين طالع يسترزق
راكب جنب الطيار
وبهيه كمان تتسوق
والموقف جنب الدار
…………………
مركزنا ياناس إتظبط
بيجى له خلاص زوار
وإن حصلت أى مظاهرة
البورصة راح تنهار
………………..
مبقاش ينفعنا التوك توك
أصبح مركون ف الدار
لا مشاكل ف البنزين
ولا حتى غلاء أسعار
………………..
من بكره هيصبح منا
خمسه وستين طيار
سعر التذكره متخفض
بتنين وتلاته دولار
……………….
ح نروح أسوان والجيزة
نقطع تذكره مش فيزة
والعيشة ح تبقى لذيذة
ونعدى بحور وأنهار
………………

كلمات الشاعر محمد ثروت عبد الحفيظ