ياغرام قلبي اللي دايب

ياغرام قلبي اللي دايب
يا هوى الشوق اللي غايب
خفت منك صدقيني.
لما فجأه بس مره
ضي عينك راح بعيد
لما حزنك غطى روحي
واتولد فيه من جديد
تهت منك صدقيني
……….
حتى موج البحر مده
جفف الفرح ف عيوني
والحنين العالى صهده
طير أشواقي وأنيني
فجأه حسيت اني ضايع
خفت منك صدقيني

خفت روحي تتسرق
من بين ضلوعي
جبت كل هدومي تمسح
طفح سايل من دموعي
والسهاد قطع وريدي
صفى كل الفرح
من جواى وعدى
مزق بتعذيبه جوفي
و بكفوفي
لما حشته ما اكتفي
ولا حتى هدى.

كان بيتمنى يلاقي
جوه حِجر القلب دم
جاته هم
ناسي انك صفتيه.
ناسي انه بس عايش
بالحنين اللي انتي فيه.
وان نبضه
يزرع الشوق ف وريده
لما نبضك يسري فيه.
وإنه خايف.
زي عيل ضاع دفا أمه
اللي ماسك روحه فيه
خفت منك صدقيني

وسط زحمة كل عزالي
…….. تسيبيني
لو يقولوا عني مجرم
لاجل ما بعشق عيونك
او يقولوا اني فاشل
لما بتغزل في لونك..
او أحس بسهم طايش
لما تسرقني جفونك
صدقيهم و كدبيني…

لما يسجد
قلبي من لهفة رموشك.
وإن كل الناس تعاند
أو تحوشك..
برده تيجي و تعشقيني.
قطعيني
حته حته ومزقيني.
بس أوعى ف لحظه
تقسي. وتكرهيني

ولا ييجي في عقلك انك
تمشي و لدمعي تسيبني
أو اكون لك نص خلصت معطياته وتقفليني.
أحزفي كلمة فراق
قلبي مُر و صبر داق
لو نويتي عالفراق..
يبقى بيدك
تقتليني
………. حسن حفني