امي
…….
وانا باخطي تاتا تاتا
مسكتني بالتلاته
باليمين والشمال
وقلبها الابيض
لو عودي مال
يجري عليا بالتلاته
خوف وحب وحنية
ترميه ليه
تحت مني وساده
تاتا تاتا خطي العتبه
والعتبه بالنسبة لي هضبه
تفردلي بسمتها سلم
ودعوتها كانت احلى عادة
اخطي الهضبه بخوفي
ترفعني لفوق
على صدرها
بسم الله … من فمها
البوسة سكر زياده
جوايه طفل كان مجنون
على الفرن والكانون
يجري … يلعب
يمسك نارها
تجري من غير قانون
متعرفش ايه اللي هيجرالها
القى الدفا
من حضنها
والبسمه تشيل الخضه
اللي بتخضها
لا ضرب ع اليد
والا ع الكف
حنيتها ملهاش وصف
كانت فوق العادة
ولما خدني سني لفوق
بشوية
كانت تحاوطني
بطوق
الحنية
والمريله البيج
والشنطه القماش
وكتاب حارتنا
جنب بيتنا
واللوح الصاج
وحدوتة الظهرية
على رجلها راسي
تحكي وتحكي
خايفه على احساسي
وانا مش راسي
بجر الشكل مع دبان وشي
كانت تقول
هشي امشي امشي
ما تزعلوش الباشا
ما انا كنت باشا
في عينيها
وكنت الملك والسلطان
في اي مكان
وكبرت شويه كمان
والدعوه في الروحه والجايه
يحفظك ربنا
يا نور عينية
وبالدعوة ديه
عايش عمري لحد الموت
اللهم ارحمها
وادخلها جنات الخلود
يا رب الملكوت
٢٢/ ٣/ ٢٠٢١
