طول عمرها لامنا
كانت حبيبة الكل
فراقها كان صعب وأذنا
راحت الأمانة لصاحب الفضل
حبيبة أبويا وأخته
قلبه ومرايته وبخته
قلبها كان بيطل
ويغيب ويسأل على الكل
زعلان منك ليه يواد ما بتجيش؟
فينك كده خبر ايه؟ . مفيش
طب أبقى بأن زي أخواتك
أنا ليا حق فيك ولا مفيش
أنا اللي في اللمة ربيتكم
كنت الأم والعمة في بيتكم
شهور يا واد وما تشوفنيش
ظروف يا عمة. طب قوم قل
والله حبك فينا زاد ما قل
وتغير بعدك طعم زاد والعيش
طول عمرنا شفينك سند
جبل واعر وعليكي بنتسند
أزى يتهد الجبل ويصبح مفيش
مالك كده؟ بان عليكي التعب
شويه تعب وما تقلقونيش
أنا كويسة وعلى المسا
هأخد الدوا وهأبقى كويسة
وما تخافوش وما تزودش الأسي
وعدي المسا وراه كما مسا
ووعدك لينا تبقى كويسة أتنسي
وفارقت الروح والموت رسي
والحزن خيم فالقلوب والكل أحتسي
والدمع نازل من العيون حصي
والصدمة أكبر من أننا نصدق ف العزا
معقول دا كانت لسه كويسة
وصوتها لسه في الوادن
ساعة الأذان بتدعي لينا
بالخير والرزق والأمان
ولو شوكة دقت حد فينا
كان الدموع تبل الحيطان
والصوت منها يروح تبكي تنوح
ولو ما طمنتش لايمكن تنام
وتقوم وتدعي ف القيام
أكرمهم يارب أنت السلام
وأبعد عنهم كل الألام
وأبعد عنهم ود الحرام
وأكفينا شر غفلات الزمان
ماتت خلاص وفضي المكان
دا صوتها كان في البيت أمان
أسألوا عنها كل الجيران
أسألوا حتى صور والحيطان
دا بفراقها قطعت بالجميع
وكسبت هي بس الرهان
قالت لو طلعت من بيتي
أنا عارفة مش هعود
قولوا للطيب يمشي يعود
الموت خلاص دق البيبان
ونزل خلص نعي وبيان
وهتبقي سيرتك الطيبة
يا طيبة على كل لسان
ربنا يرحمك ونتقابل ف الجنان
نسألكم الدعاء لها بالرحمة والمغفرة والعتق من النار اللهم أمين
