بيت الأدباء والشعراء

ده الطبيعي أنه. يكون

دا الطَّبيعي انُّه يكون !!
حتَّىٰ لو فـِ الحق ثورتوا
كلُّه طبعآ بالقانون
مهما كات وجهة نظركوا
إنسوا إن الصُّوت يفيد
وانُّه قادر عــَ المَزيد
ولاَّ فـِ الشِّدَّه يعيد
الحقوق لو انظلمتوا
عــَ الصِّياح صيحوا براحتكُم
والنَّتيجه ليها ناسها
صعب تبقىٰ مِلك إيدكُم
ولا تتشاركوا فْـ ميراثها
اللي عدَّىٰ كان تجاوز
أو كنايَه لمعنىٰ جايز
مش مُتاحَه للي عايز
كُل ما يرغب حدوثها
والنَّهاردَه القصَّه واقع
لجل ما تضلُّوا الطَّريق
شرحها ساهل وواضح
حتَّىٰ لو حسِّيتوا ضيق
درس ليكوا من الطَّبيعَه
فلسفه سهله وسريعَه
لايقه عــَ النَّاس المطيعَه
مهما يخدعها البريق
اصل يعني لو نَجحتوا
فـِ اللي إختارتوه يكون
نفرض ان مَرَّه طيحتوا
والخيال صابُه الجنون
قام راودكُم عن أماني
فيها هدم لحد تاني
ربَّما شايفينُه جاني
فَـ اللي تطلبوه يكون
القرار دا مش حكيم
ان صوتكوا يكون مَصير
تسمحوا هو انتوا مين ؟!
ياللي بتقولوا الضَّمير
وحدهُم أهلُه وناسُه !!
وارجعوا تاني لتراثُه
تلقوا صوتهُم كان أساسُه
والتَّاريخ بيهُم قرير

علىٰ هامش الفوضىٰ
مسعد سليم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: