إفتتاحية
مد الخطاوي ياجدع
وإفرد إيديك بالخير
وِإوصِل اللي إتقطع
فارد جناح الطير
وأوعي ف يوم تتفزع
لو ضاقت الأحوال
ولا يصيبك طمع
وتبُص لرزق الغير
عايزك تكون مقتنع
إن ليك رب كبير
إزرع ياواد الأمل
في الأراضي البور
وإرويها بِحُسن العمل
تجني المحبة زهور
وإغزل توب السعادة
بخيوط من نور
تلقي الوداد إكتمل
والقلب سعيد مسرور
عيش دنيتك بالهنا
وإرضي بالمقسوم
وإدعي تكون السنة
نصرة للمظلوم
ونقابل بعض هنا
بعد زوال الغيوم
كل سنة وإنتم طيبين
كارم والي
