حكايات البشر

حكايات البشر

حكايه .. هاحكيها
غنوه .. هاغنيها
عن البشر هارويها
حروفها هنا هايمه
قويه مش نايمه
لحكايتنا دايمه
……………………….
ونبدء الحكايه
ونقول كان ياما كان
نفوس وليها العجب
ميزانها تقله دهب
ساكنها صدق وإيمان
حب وقلوب صافيه
من ربها خايفه
عايشه رضاها في امان
……………………….
محبه ونور وسلام
ضحكه تحلي كلام
عبرۃ تهز كيان
صفا هنا ووئام
ايد بتحضن ايد
لمه في اجمل عيد
فرحه برزق حلال
صليب في حضن هلال
……………………….
ونكمل حكايتنا
ونقول كمان و كمان
اسمع وشوف ايامنا
بلاش نعيب في زمانا
نشكي نقول اوجاعنا
يرن الصدي في ودانا
نقول ومين يسمعنا
……………………….
الحب والله هجرنا
الطبع بقي قاسي
والناس كتير بتقاسي
نداله وش اساسي
نصاب عامل ناسي
غير المهنه سياسي
……………………….
ونحكي ونقول
الابن يقتل ابوه
والاخ يعادي اخوه
والصاحب ياما خانوه
في الشده هربو باعوه
……………………….
و نقول مين السبب
سوال عايزله جواب
الغدر ليه بين الصحاب
الظلم ليه زاد علي الرقاب
من الحبايب تعب الغياب
……………………….
هرفع ايدي لسما
هادعي واقول يارب
برحمتك نجينا
من ظلم البشر احمينا
طيب قلوبنا وداوينا
رجعنا لبعضينا
وفي جنۃ الخلد فرحنا
بشوفت حبيبنا ونبينا
عليه افضل الصلاۃ والسلام
……………………….
حكايه .. هاحكيها
عن البشر هارويها
خالدالمنصوري