البلياتشو والاراجوز

دويتو
البلياتشو & والارجوز
(الاصل & والصورۃ)

تعالو وشوفو حكايات الجوز
بيضحكونا عمال علي بطال
لا شفتهم ف يوم ضاربين بوز
فرحانيين في جميع الاحوال
لا عمرهم طلبه جاه ونفوز
بيسعدو جميع الاجيال

أضحك ياعم البلياتشو
ووريهم أحلي الحركات
وأقول ياعم الأراجوز
وسمعنا أجمل الحكايات

البلياتشو الغلبان
كل أيامه بتشبه بعضيها
وحياته عايشها مقضيها
بيوزع فرحه على وشوشهم
وجراحه ومين حاسس بيها

الأراجوز اللوز
كمان منور معانا عم الأراجوز
بيضحك عمال علي بطال
لا شفته ف يوم ضارب بوز
فرحان في جميع الاحوال
لا عمره طلب جاه ونفوز
و بيسعد كل الاطفال

البلياتشو الغلبان
عايش يتمشى على المسرح
بتشوفه الناس تضحك تفرح
وهمومه أوام فى عيونه تطرح
فيخبى دموعه فى الالوان

الأراجوز اللوز
اكله في صحن وشربه ف كوز
وشاكر ربه علي هذا الحال
ضحكهم ياعم الأراجوز
وابكي انت ودي عايزه سؤال

البلياتشو الغلبان
بيخدع جمهوره بالضحكه
ويقولو الله على حركاته
يعمل مبسوط وسط السقفه
ويدارى فى الضحكه أهاته

الأراجوز اللوز
مسموحلك تفرح لما تعوز
بس ان يوم تزعل مش محال
واياك من الحزن تبان مهزوز
اتنطط ضحكلنا العيـــال

البلياتشو الغلبان
بيلون نفسه بلون الصيف
مع ان عنيه بتموت م البرد
يرسم ع المسرح ألوان طيف
بس الالوان جواه بتتهد

الأراجوز اللوز
صعبان عليا عم الأراجوز
شوف لونه ازاي بقي بهتان
ومن كتر الكتمان بقي عجوز
ويبان سليم وهو العيان

البلياتشو الغلبان
وشه الزعلان يحكى حكايه
فى وشوش الناس عينها مرايه
بتبين من جواه روحه
وبتكشف زيف الضحكايه

الأراجوز اللوز
مش فاهمين ان دي تبقي رموز
لواحد بيعاني من الحرمان
بطلوا تضحكوا دي الدنيا حظوظ
واللي زيه ده ياعيني غلبان

البلياتشو الغلبان
بيلون عينه بشمس نهار
مع ان الليل حابس روحه
ودموعه بتجرى كما الانهار
بتلطم فى القلب جروحه

الأراجوز اللوز
شوف فيه كام أراجوز متبهدل
والضحكه علي وشه بتكدب
وتشوفه تقول ده بيمثل
مع انه ياعيني بيتعذب
واحنا نسوء فيها ونستهبل
ونضحك علي جرحه فـ يتعب
مع انه تهريجه من الاول
علشان خاطر قلبنا يسعد

البلياتشو الغلبان
أنا والأراجوز منفرقش
كان هو الاصل وأنا الصوره
أنا والأراجوز مفرقتش
نظرتنا السوده المكسوره

الأراجوز اللوز
هو النوع ده في ناس ياما
محتاجه لحد يسمعها
مع ان ع الوش ولا علامه
وبتفرح وتداري وجعها
مع ان الناس دي زعلانه
نفسها بس ف حد يسعها

البلياتشو الغلبان
شفت البلياتشو فى مرايتى
وأزازها الباكى البهتان
وهتفرق أيه لو ع المسرح حتي
أو كنت انا وسط الجمهورتعبان

الأراجوز اللوز
فبدل ما بتضحك عليهم
قرب واديهم قلبك
يمكن تحتاج يوم ليهم
وييجوا يسمعوا منك
وينضفوا جرحك باديهم
ويسووك الهم والمك

البلياتشو الغلبان
هتفضل بلياتشو غلبان
بيدارى غدر الدنيا فى ألوان
عايش ايامه في امان
وحياته مقضيها كما الانسان

تعالو وشوفو حكايات الجوز
بيضحكونا عمال علي بطال
لا شفتهم ف يوم ضاربين بوز
فرحانيين في جميع الاحوال
لا عمرهم طلبه جاه ونفوز
بيسعدو جميع الاجيال
خالد المنصوري