بيت الأدباء والشعراء

سكات

((( سُـكَــات )))

عشان نعرف أيه اللى فات

إن كان دموع ولا ابتسامه

أو أهات

سكات

بكل المعانى وكل اللغات

يا ناصح حبايبك وكل الصحاب

يا زارع فى قلبك غيطان الشباب

يا تايه فى نفسك فى قلب الضباب

وناسى ان شَـعْـرك ميت وشاب

سكات

بتهرب وتصرخ وصوتك سكوت

وبُـكره الحكايه هتملا البيوت

وزرعك هيكبر ويرحل ويموت

سكات

يا رافع رايات الايمان فوق جبينك

وناسى الطريق اللى شايل سنينك

وكاره تبُـص لجذورك بعينك

اوعى ذكاءك يخونك فى دينك

سكات

يا اللى راسم الشرف فوق الجبين

وراية الإيمان ** عرضها فدان

فى قلب العين

سكات

عشان نعرف مين اللى مات

مش جايز اللى كان

ساكن فى جامع

ولا جايز اللى برقص بالصاجات

مش جايز بنت تايهه عن وطن

ولا جايز بنت حاوى وبهلوان

واحتمال بنت جان

مش جايز طفل لسه هيتولد

ولا جايز حزن من لون البلد

مش مهم هو مين ** الأهم فى العدد

سكات

يااللى ساكنين الزمن

مين اللى ساكن فى الكفن ؟

انسان نضيف ولاعفيف ولا شريف ؟

ولا بايع للوطن ؟

حقيقى النعش فات ؟

ولا لسه بشيلوا منه الذكريات ؟

بيقولوا رأس الكُـفر مات

مات اللى كان فؤاده مليان بالغضب

بيقولوا مات أبولهب

سكات

أنا اللى برسم الكلام

لوحه فوق خدّ البنات

ولا همّـنى صوت الأسود فى الغابات

ولا هزّنى نبح الكلاب فى الحارات

سكات

مفروض نوضح للبشر بعض الحاجات

حاجات نقولها ع القهاوى وفى الشوارع

والحارات

واكبر حرام

لوقلنا كلمه عن بعض الحاجات

كل واحد فينا يرسم ضحكتين

ضحكه للأمل اللى جايز يتولد

وضحكه كدابه

ع العمر اللى فات

سُــكَــات ** سُــكَــات ** سُــكَــات

******************************

شاعر القريه

فيصل بدر

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: