بيت الأدباء والشعراء

حاله توهان

حاله توهان

بحلفلك بكل الاديان .. توراه انجيل قرآن
دنيا فى حاله توهان .. حتى العمر عليه هان
انا فيكي بلا عنوان .. لكن بيكي انا ولهان
حر وعايش بلا قضبان .. بس عليه متين سجان
دنيا فى حاله توهان ..
لكن انا العشقان عاشق ترابك ونيلك وناسك
مانا واحد من ناسك وفى محرابك انا فاسك
حتى حبك جوايا مناسك وانا فى العتمه احساسك
وعيونى هيه حراسك وعشقك صحيح فتان
دنيا فى حاله توهان ..
رسيني ابوس ايديكي .. رسيني على بر فيكي
لو لقيتي حد يرسيكي .. رسيني دانا حته منيكي
بدال مانا تايه فى موانيكي .. وتايه فى واديكي
رسيني على بر .. يا فايتانى فى حبك غرقان
دنيا فى حاله توهان ..
انا المتيم فى وصفك وانا اللى حطاه على رفك
وانا اللى تزعليه بليل والصبح واقف فى صفك
انا ابنك انا عارفك ولا اقدر يوم اخالفك
وانا قدرك يا قدرى يا نور فجرى انا الهيمان
دنيا فى حاله توهان
ابوس ايدك تنجيني .. ما ترميني بين شطين
مابعرفشي اعوم .. وان عومت هروح على فين
خدى روحى خدى عيني .. وارمى طوقك ينجيني
دانا ماطقشى طوق .. غير يطوقنى وانا غرقان
دنيا فى حاله توهان
انا اللى تحت ترابك مدفون واعيش راضى بالدفنه
عشانك انتى الحياه دى تهون وانشالله الروح دى تفنى
بس نفهم فيكي ايه .. ايه اللى جرى ليكي .. ليه غيرتى الدفه
وليه بعدلك موزنتيش .. طبت منك الكفه .. ولا العيب فى الميزان
دنيا فى حاله توهان
خالدالمنصوري

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: