تاريخ وحضارة

الملك تحتمس الرابع

كتبت رحمة احمد ابوخليل

تحتمس الرابع ( حكم من 1425 ق.م – 1417 ق.م ) ، ملك مصر من الاسره الفرعونيه الثامنةعشر. ابن امنحوتب التانى و الملكه تى-عا. عمل معاهده مع امبراطورية الميتانيين الهندو-اوروبيين فى شمال سوريا و شهد عصره استقرار و سلام وقت ما مصر كانت فى قمة ازدهارها و مجدها.

و هو لسه امير رأس القاعده العسكريه فى ممفيس و كان بيقضى وقت فراغه فى الصيد و الرياضه جنب الاهرامات . و فى مره و هو نايم بيرتاح جنب ابو الهول حلم بإن الاله حورس ، اللى كان بيعتقد ان ابو الهول بيرمز ليه ، بيطلب منه يزيح الرمله المتكومه على جسم ابو الهول فى مقابل انه حايبقى فرعون. قصة الحلم بترجح ان تحوتمس الرابع ماكانش ولى عهد عرش مصر و انه حكم بسبب وفاة اخوه الاكبر و انه استخدم الحلم كمطلب الاهى بإنه يحكم مصر.

بعد ما اتنصب ملك على مصر عمل حمله عسكريه فى فلسطين و سوريا اخمد بيها تمردات صغيره. تهديدات الحيثيين فى اسيا الصغرى خلته يدخل فى مفاوضات مع الامبراطوريه الميتانيه اللى كانت فى الاصل معاديه لمصر فى سوريا و اتعملت معاهده سلام بين الطرفين اتقوت بجواز تحوتمس من اميره ميتانيه و تبادل الهدايا و اتنازل تحتمس للميتانيين عن مدينة الالاخ ( اشانا Açana او تل العطشانه فى تركيا دلوقتى ).

فى سنة حكمه التامنه حصل تمرد عن طريق زعيم صحراوى فى النوبه السفلى فطوالى جمع الجيش المصرى و المراكب النيليه و راح على هناك و هزم المتمردين اللى من المحتمل مثلو خطر على مناجم الدهب فى منطقة شرق السودان. اتوغل تحوتمس فى السودان و حدود الامبراطوريه المصريه بقت من كاروى فى الجنوب لغاية نهارين على حدود امبراطورية الالميتانيين فى الشرق و استقرت الاوضاع على كده.

فى بقية فترة حكمه المستقره رفع تحتمس مسله ضخمه فى طيبه من المحتمل كان بدأها جده. المسله دى بتزين دلوقتى ميدان لاتيرانو قدام كنيسة سان چيوفانى فى روما. و فى غرب طيبه بنى معبد جنازى صغير لكن جميل ، و بنى محراب صغير لمركب امون كان بيتعمل فيه كل سنه احتفال. فى النوبه كمل بنا معبد ضخم كان جده بدأ يبنيه قبل ما يتوفى ، و بنى اثارات تذكاريه فى ممفيس المكان اللى قضى فيه فترة شبابه.

تحتمس الرابع اظهر نوع من التبجيل للاله اتون اللى لعب بعد كده دور كبير فى ديانة حفيده اخناتون ، و فى الفن كانت فيه شوية عناصر ظهرت فى الاسلوب الفنى بتاع تل العمارنه فى عهد اخناتون ، لكن مفيش اى حاجه تاريخيه بتبين ان كان فيه خلافات بين تحوتمس الرابع و كهنة امون.

تحتمس الرابع اتوفى و هو لسه شاب بعد حوالى تسع سنين من حكمه و اتعثر على مقبرته سنة 1903 و اتلقى فيها ادوات و موبيليات. خلفه ابنه امنحوتب التالت اللى خلفه من الملكه الاساسيه مش من الاميره الميتانيه اللى اتجوزها.

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: