بيت الأدباء والشعراء

بطلت احلم

❌ بطلت احلم

خلاص بطلت انا احلم
ف وقت الصمت فيه اسلم
خرجت حروفي م اللعبة
وقمت رجعت للحسبة
لقيت الكفة مش طابة
وخوفت اتمادي و اندم
خلاص بطلت انا احلم

خلاص عقلي انا مقرر
بلاش اخطائي تتكرر
ولو طعم العسل مرر
هقول طعمه بقي اطعم
خلاص بطلت انا احلم

اوشوش نفسي واحذرني
و عقلي يقوللي اعذرني
اخاف الكلمة تكسرني
واقول ان السكات اسلم
خلاص بطلت انا احلم

و لو الكلمة وكلاني
اقص بايدي للساني
و أحطم كل اسناني
عشان يبقي الكلام اهتم
خلاص بطلت انا احلم

هخبي اللقمة ف اكمامي
واقول للكل يا اعمامي
و لو اللص صار حامي
هقول كفه الشريف يسلم
خلاص بطلت انا احلم

ولو قطعها 100 حتة
و مص الدم م الجتة
هعوم وياكو ع الفتة
ومن جاور الكريم يغنم
خلاص بطلت انا احلم

خلاص بطلت انا احسبها
هيمشي امتي و يسيبها
ولو يعني بيوم سابها
اكيد برضو ال جي اسخم
خلاص بطلت انا احلم

انا نخيت يا مجدافي
خلاص مبقتش متعافي
مفيش جنبي بشر صافي
ومن خاف البشر يسلم
خلاص بطلت انا احلم

غريبة ملامحي يا مراية
قتلتوا احلامي جوايا
فيعني القتل دا جناية ؟
ردوا بجد عايز افهم
خلاص بطلت انا احلم
#الشاعر_ابراهيم_دعبس

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: