فرن ستي

⏰⏳🕞⌚. الليالي كات بخيرها

فرن ستي وماجورها
والليالي كات بخيرها
والحبايب و القرايب
كات تحب تروح تزورها

كات بتدي بالحفان
فاتحة بيتها للجيران
للي خايف او جعان
هيه رمانة الميزان
بيتها واحة الامان
عمري منسا الخير بتاعها
امي كات تاكل صباعها
لما تاكل اكل ستي
ستي تشبع لما ناكل
ستي جايبة ألف راجل
كله شارب من طباعها
وده نفعها لما ماتت
ستي ماتت
ستي ماتت
ستي ماتت بس عايشة
وروحها عايشة في المكان
صوتها رانن في الودان
قلبي جابني لحد بيتها
اللي لسه فيه ريحتها
وطيفها مالي المكان
والمصاطب والحيطان
ولما افتح البيبان
بلقا نفسي ف حضن ستي
نفسي ترجع يا زمان
بالاحبة و باللي كان
والقي كله جي يزورها
والليالي كات بخيرها

ستي ماتت بس عايشة
في الحكاوي والغناوي
في قلوبنا والعيون
ستي يعني ازاي تهون
ستي كات دنيا وكون
كات كبيرة وكات قانون
ولما تطبخ ع الكانون
كات بيبان البيت تخبط
كله عايز اكل ستي
خدي يا اختي
خد يا اخويا و خد يا خال
خدوا ليكو وللعيال
اكل ستي ماشي حلو
ايه اللي حلا الماء ف زيرها
أه يا ستي و فوازيرها
والليالي كات بخيرها

ستي ماتت بس عايشة
ست عاقلة ف دنيا طايشة
واقفة صلبة بارض هايشة
اه يا ستي الحيطة بايشة
بس سقف البيت شديد
رغم أنه من جريد
والليالي له تكيد
بس عمره يوم ما سلم
رغم أن ما لوهش سلم
بس قوللي المولي سلم
هوه ربي اللي ساترها
وميسر خط سيرها
والليالي كات بخيرها

والليالي كات حبيبتك
للنهاردة تجيب ف سيرتك
تحكي عزك ويا طيبتك
يا جمالك يا حلاوتك
اة ياستي يا ست ابوها
لسة طفلة وجوزها
كات بتلعب بالعروسة
عملوا منها اوام عروسة
شيلوها الهم بدري
وهيه طفلة ولا تدري
شيلوها هم بيت
كعبلوها ب الف خيط
دار جديدة وناس جداد
والطبايع كات شداد
و الاصيلة ياهو تسد
تبقي جدعة وتبقي جد
اه يا بختك اه يا جد
كان عاشقها و كان يغير
في الغيطان ايدها بايده
واحلي قمرة ف السرير
كان راجلها و الامير
تفاصيل بينهم كتير
اي سر كان في بير
رغم أنه فاتها بدري
وهية عاشت الكتير
ده قدرها ومصيرها
حمل صعب يشيله غيرها
والليالي كات بخيرها

طفلة لسة بالضفيرة
شايلة هم عيال كتيرة
ولا جابت مرة سيرة
انها شابت قوام
ولا فتحت في الكلام
كات بترمي السلام
كات تهادي بالطعام
الصغير والكبير
بنت عز و بنت خير
حتي برضو العصافير
فوق سطوح البيت تنام
تلقي أمن وطعام
تلقي ستي حاطة مية
و بدرة قمح ع الدوام
ده اللي خلا السقف جامد
ده اللي خلا السقف صامد
زي ستي كان معاند
والبيوت بتجيب آخرها
والليالي كات بخيرها
#الشاعر_ابراهيم_دعبس