بيت الأدباء والشعراء

حكايات. خالتي. بمبه

بسم الله الرحمن الرحيم
موعدنا مع حكايات خالتي بامبة والحلقه رقم ١٧
تعالوا نشوف خالتي بامبة هتكلمنا عن ايه النهاردة.
السلام عليكم ورحمة الله وبركاته
أهلا بكم يا أحبابي ربنا يبارك فيكم وفي زريتكم ويجعلهم أبناء تاجهم الخلق وحسن التربية والأخلاق الحميدة.

والله يا حبايبي انا زعلانه اوي من اللي بيحصل وحازز في نفسي الشبابوعمايلهم وتصرفاتهم اللي بقت لا تسر عدو ولا حبيب.

يعني بجد يرضيكم اللي بيحصل ده أنا عن نفسي مايرضنيش وقلت لاء لازم اتكلم معاكم علشان نشوف حل ونحد من الظاهرة دي.

بعد ما كانت المسلسلات والافلام بتساعد في بناء مجتمع سليم خالي من السلبيات
للاسف الشديد مسلسلات وافلام العصر المتحضر الحديث بتساعد على نشر الفوضى والبلطجة والاسلحة البيضاء في ايد الاطفال من كماليات الرجولة المبكره .
كل يوم بنسمع عن خناقه وتثبيت الناس في الشوارع والاماكن الضيقه
ناس ماشيه في امان الله تلاقي عيال طالعه لهم من اي مكان يثبتوهم وياخدوا منهم كل اللي معاهم حاجه غريبه على مجتمعنا بجد
كنا بنمشي في الشوارع أمنين مطمئنين ان مافيش اي حاجه وحشه هتحصل لنا وان الناس كلها اهليه في بعضهم ماحدش هايئذي حد ولا يقربله بسوء

ايه الجديد واللي غير الناس وخلاهم ماشين في الشوارع ب سنج ومطاوي وسافوريا وحاجات غريبة وشكلها يخوف وبقت دي عنوان الرجولة عند اطفال لسه ماعدوش سن الرشد
وبيلعبوا بيها وكمان في الافراح تلقاهم على خشبة المسرح قدام العريس والعروسه يرقصوا بالاسلحة البيضاء دي وكمان الشماريخ واللعب بالنار وكتير بتحصل كوارث بسبب الحاجات دي.

اكيد كلنا سمعنا عن الحادثة الاخيرة اللي حصلت من ايام بسبب البلطجية واولاد الشوارع وناس مش متربية ولا تعلم شيء عن حسن الخلق وشهامة ابن البلد

شاب يا حبيبي في مقتبل عمره صاحب اخلاق وشهامه شاف ولد صايع معروف انه بلطجي واقف ومثبت بنت وعمال يتلفظ عليها بالفاظ خارجه وبيمد ايه عليها وبياخد الموبيل بتاعها
شافه الولد الطيب صاحب الخلق الطيب الشجاع اللي بيفكرني باخلاقنا وشهامتنا اللي كانت زمان المهم الولد تدخل يدافع عن البنت
راح الولد البلطجي مطلع مطوة وغرزها في جسد الشاب المحترم وراح فيها مات استشهد علشان مروته وشهامته ورجولته ماسمحش لنفسه يشوف بنت بتتعرض للاذي من ولد بلطجي ومايدافعش عنها حتى ولو كان النتيجة ذبحه وانتهاء اجله .
والأكثر حزن وخزي ان أم البلطجي مدرسة بتربي نشأ وتعلمة في التربية والتعليم
ازاي ام فاشلة في تربية ابنائها تنتج وتساعد في تربية وتعليم شباب في المدرسة ولها جملة دائما على لسانها تقولها للبنات في المدرسة ( الحمد لله اني ماخلفتش بنات علشان البنات بتجيب لاهلها العار) يا خبر بالله عليكم هذا الكائن يصلح ان ينتمي لوزارة التربية والتعليم؟
من جهلها نسيت أنها امرأة!!
اكيد لها جذور من عصر ما قبل الاسلام ايام وأد البنات اما كان الكفار بيدفنوا الاناث احياء .
تتباهى بخلفة الصبيان وماشاء الله على تربيتها انتجت لنا ولمصر كلها بلطجي وسفاح وكان عار على جمهورية مصر باكملها هذا البلطجي المدلل من ام قلبها متحجر كما عقلها قاسية لا تعرف الرحمة وعار على كل الامهات بان تنتمي مثل هذه الحشرة الضارة لكلمة ام

شفتوا بقى وصلت اخلاق اولادنا لفين بسبب اللي بيتفرجوا عليه من مسلسلات وافلام هدامة بتهد وتقضي على اولادنا
تقضي على زهور لسه طالعة تشوف النور

تهد فيهم وتخليهم ينحرفوا ويضلوا الطريق طريق الاصلاح والرشاد

تلاقي الممثل ماشي بسنجه وجسمه كله ملفوف بحزام مترشق اسلحة شكلها غريب سكاكين ومطاوي وحاجات غريبة واسمائها اغرب ورايح عامل فيها شجيع السيما يضرب ويموت والناس تعمله بطل وهيرو مافيش حد زيه

طبعا الشباب اللي في السن الحرجه سن المراهقه بتقلده علشان عايزة تكون لها شعبيه زي الممثل ده

تقلد تقليد اعمى وياسلام اما تعرف ان الممثل ده بقى في يوم وليلة ملياردير وعنده قصور وعربيات و و و الى اخره من اللي بيحلم به اي شاب لسه بيحلم انه يكون زيه وبياخده قدوة له وبيقلده في كل شيء

وللاسف الممثل ده عمري ما شفت له غير افلام ومسلسلات تحث على انتشار الفوضى والبلطجة ونشر الرذيلة وكل الموبيقات وادمان المخدرات
دون اي هدف او ارشاد او اي شيء صالح يهدف له المسلسل او الفلم ده

وفي الاخر يطلع بطل والناس كلها تهلل له وتاخده مثل اعلى

ياريت نتقى ربنا في اولادنا يا صناع السينما يا اهل الفن
كنا زمان نقول ان الفن ده فن جميل بناء بيضع يده على اي شيء خطأ ليقوم باصلاحه
كنا بنتعلم منه بر الوالدين بنتعلم منه احترام الصغير للكبير حب الاهل والاخوات لبعضهم
اتربينا واتعلمنا من التليفزيون والسينما مفاهيم وحاجات كتير نفعتنا في حياتنا وتربية اولادنا.
لكن للاسف الشديد الان دخل على هذا الفن الناس الجهله واللي معاهم فلوس عايزين يكسبوا وبس
دون النظر عن المادة اللي بيقدموها شكلها ايه او هتعود على الناس بايه المهم يجمعوا فلوس وباي شكل
سواء افلام كلها عري واسفاف والفاظ بزيئة غير انتشار البلطجية

فين الهيئات الرقابية للمصنفات الفنية ونقابة المهن التمثيلية اللي مسئولة عن الممثلين والحاجات اللي بتتعرض على الشاشات الصغيرة والكبيرة ياريت يكون فيه رقابة على اللي بيتعرض للناس

ارحمونا يرحمكم ربنا

….. ياعينـي عليــــــا……

#بقلم_حنان_محمدعبدالعزيز

#اعدام_راجح_قاتل_حق_محمود_البنا_فين
#اعدام_راجح_قاتل_حق_محمود_البنا_فين

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق