بيت الأدباء والشعراء

في اللحظه

– فى اللحظه اللى البنت صرخت و قالت لراجح انت ماعندكش اخوات بنات , محمود البنا كان أول من حضر من اللى سمعوا صراخها ووقف يدافع عنها رغم انه عارف ان راجح بلطجى بس نار الشهامة والرجولة اللى جوا محمود كانت أقوى, ولما اترصدله راجح واتنين بلطجيه كان واقف وقفة أسد ولما شاف راجح بيخرج المطوه كان ممكن يتأسف لراجح ويتنازل عن كرامته بس كان واقف زى الأسد لأنه على حق لحد ما أستقبل أول طعنه فى رقبته وبعدها راجح كمل طعن فى بطنه وباقى جسمه

– دم محمود غالى زى دم الجندى اللى مات فى 6 اكتوبر , ده مات عشان بنت والتانى مات عشان الأرض والاتنين شهداء ماتوا وهما بيدافعو عن عرضك وشرفك , كنا بنقول ان جيل التيك توك اللى جاى ده جيل فاسد وبايظ ونقرف من ستايل لبسهم وشعرهم ونقول ازاى الجيل ده هيحرر الأقصى , لحد ماظهر محمود البنا وكسر النظرية دى وأثبتلنا ان الأجيال اللى جاية فيها رجالة عندهم مروءه ونخوة وغيرة ع عرضهم وشرفهم

– أقسم بالله راجح ماينفعش يطلع من السجن عايش , انا عارف ان وراه ضهر وعيلته لواءات فى الداخلية وأنهم مش هيسمحوا انه يتعدم وزورله بطاقته وشهادة ميلاده عشان يثبتوا انه انه تحت ال 18 رغم ان كلنا عارفين انه هو داخل ع سن ال 20 , بس حتى لو تحت ال 18 سنة راجح ماينفعش يعيش , راجح فكرة لازم ندفنها عشان لو عاشت احنا حرفيا هنبقا فى غابة لأن كل اللى شبهه هيتحولو لكلاب صعرانه مش هنعرف نوقفهم الا بالدم و هنشوف محمود جديد بيموت تانى

– بالله عليك يارئيس مصر ويا كل مسؤل يقدر يتدخل فى القضية دى قدامكم فرصة تخلونا نحب البلد دى تانى , قدامكم فرصة متقدمة ع طبق من ذهب لو راجح أتعدم انا وشباب كتير هيبقا عندنا أمل فى البلد دى وكل شاب هيشوف متحرش او بلطجى مش هيخاف منه وهيدافع عن عرضه وشرفه حتى لو هنموت زى محمود البنا بس نبقا عارفين ان ورانا ضهر وقانون هيجيب حقنا

– يوم 20/10 هو الفاصل ما بينا , فى ملايين مستنين القصاص وهتلاقوا الأف قصاد المحكمه , ياتجيبو حق محمود البنا وتطفوا النار اللى جوا صدورنا وهتكسبوا تعاطف وحب شباب كتير للبلد دى وهما بيشوفوا الحق بينتصر لأول مرا فى حياتهم , يا هتحكمو علينا نعيش جوا كابوس راجح واللى زيه وهتولدوا جوانا نار كره وغل اتجاه البلد واحنا بنتفرج ع حق محمود البنا وهو بيضيع وده عمره ماهيكون فى مصلحه البلد لأن الدم بيجيب دم والظلم بيجيب خراب

” أقسم بالله العظيم راجح ماينفع يطلع منها حى ”

البوست منقول

#القصاص
#اعدام_راجح_حق_محمود_البنا_فين

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: