كان. نفسي

كان نفسي

كان نفسي زمان ابقي معلم
واتعايق قدام الحاره
والجزمه في رجلي ياناس تلمع
مربوطة بخيط الدوباره
وأحط الريحه تفوح مني
معموله بأيد العطاره
واخوش الحاره انا وصاحبي
تقابلني بزفه وزماره
ما انا برده نزيه عارف نفسي
فنجري من عرب الهواره
من يومي ياناس ديما افهم
وطموحي فنون الاداره
ومعايا شهاده تقول فعلا
استاذ دبلوم التجاره
كان حلمي أكون حاجه تشرف
او حتي وكيل في الوزاره
ما انا أصلي وسيم شكلي يجنن
ومكاني هناك في ا لسيفاره
كان نفسي ياناس فعلا ابقي
محبوب وبشهرة جيفاره
ومعايا فلوس تملأ الشنطه
طلباتي تكون بالاشاره
اشتري تفاح مانجه ومشمش
واللحمة وسمك الطوباره
وانده علي شيال حتتنا
من بيتنا يشيل الظفاره
أصل انا فييس طبعي بنصرف
وأسألوا سكان العمارة
حيقولو عليا الواد جنتل
ودا أصل صريح العبارة
معزور يا جماعه دا كان حلمه
يرتاح من ريحة البيصاره