علموا ولادكم المباديء

علِّموا ولادكوا المبادئ
إحفظوهُم مـِ الشِّيطان
قبل ما يسمِّم عقولهم
ويراودهُم عن حرام
لجل يبقوا نشأ صالِح
مش فـِ غفلَه زي راجِح
لمَّا مالتقىٰ لُه ناصِح
حوِّلوه لمُجرِم جبان
المراهِق صار نَزِيل
لما أهلُه ما قوِّموه
الجريمَه كات دليل
والنَّهاردَه بيلوموه
لوموا فَن صار بعافيَه
لوموا شمعِة أهل طافيَه
لوموا أخلاق جالها كافيَه
والضَّمير بينكُم راعوه
هو مُجرِم وبأيديكُم
والضَّحايا سببها إنتُم
بطَّلوا تغمُّوا عنيكُم
إلا ما في الحق ثورتُم
لو شعوركُم كان بريء
كنتوا ما نَصفتوا الرَّديء
حتىٰ صار بيكُم جريء
والنَّهارده عنُّه لومتُم
إقرأوا مرَّه الرِّسالَه
صلَّحوا بُكرَه اللي جَاي
صَحُّوا ضمايركوا العذارىٰ
طَمِّنوها بنور وضَيّ
ان مافي ظُلم تاني
ان مافي بينَّا جاني
وان فيه فَجر لأماني
جِوَّه منَّا نورها حَيّ
رمِّموا أفكار هزيلَه
عيدوا بنايتها بعنايَه
بس تِوصَل للفضيلَه
عنها ما تقولوا كِفايَه
إنسوا أي موضَه هَشَّه
بزيادكوا تعبنا دَوشَه
كُل يوم بتجِد كارثَه
والَّه مَلِّينا الحِكايَه

علِّموا ولادكوا المبادئ
مسعد سليم