حكايات خالتي بمبه

السلام عليكم ورحمة الله وبركاته
الان مع الحلقة السابعة من حكايات خالتي بمبه
اولا وحشتوني جدا وبعتذر عن غيابي بسبب اصابتي بدور برد وزكام عفاكم الله احبابي وعفا عنا وعنكم
اليوم تعالوا نشوف خالتي بمبه هتحكي عن ايه
بعد السلام والاطمئنان على الاحباب الكرام نبدأ معاكم الكلام
طبعا انتم عارفين ان الامتحانات على الابواب اقصد امتحانات الثانوية العامة ( البعبع) طبعا مش عايزة ولا محتاجه اقول لكم حكاية كل بيت فيه بنت او ولد في الثانوية العامة وباقي ايام ويقابل الوحش ياقاتل يا مقتول
وكتير كل عام وقت الامتحانات بنسمع عن انتحارات واغماءات وووو الى اخرة من كوارث وزالزال الثانوية العامة
عايزة اعرف ليه كل ده اولا الدروس الخصوصية اللي هي في حد ذاتها عبء كبير وتقتم ظهر كل رب اسرة اللي يتمنى يشوف ابنه او بنته حاصل على اعلى الدرجات علشان يقدر يدخل كلية محترمة من كليات القمة وفي سبيل حلمه ده بيصرف دم قلبه وممكن في مادة واحده يضطر يودي ولاده درس واتنين وثلاثه وكل مدرس بياخد الشيء الفلاني مبلغ وقدرة
حتى اذا ما عنده وظيفه حكومية بيضطر يشتغل شغلانه واتنين علشان يقدر يكفي ويوفي ويسدد فلوس الدروس
اما بالنسبه لطالب وطالبة الثانوية العامة تحس انه شخص 🧑 غير عادي طول اليوم شايل شنطته ورا ظهره وعمال يجاهد يلف على الدروس من الدرس ده للدرس ده ويروح بيته اخر اليوم هلكان عايز ياكل وينام ساعة ويواصل الجهاد يفضل يذاكر للفجر ووقت ظهور الشمس في كبد السماء تبدأ الدورة المعهوده للطالب وولي امره
تعالوا بئا نشوف المدرسة ودورها في هذه المرحله بصراحة المدرسة بتهتم فقط بدفتر الحضور والغياب هذا اقصى ما يمكنها فعله انما حضور طلبه او مدرسين مافيش نهائي لانهم بيكونوا مشغولين بالدروس الخصوصية ومواعيد السنتر الخاص بالمدرسين ومديرينهم المسؤولين عن تحصيل ثمن الدروس من الطلبه
تعالوا بئا في الامتحانات تحس ان اللي بيحط الامتحان ده انسان مريض نفسيا وفاكر نفسه جهبز او عالم من العلماء اللي من كوكب اخر جاي من زمن تاني او عنده عقده بيطلعها على الطلبه المساكين دولا
يحط امتحانات غير متوقعه ولا مرت على اي منهج من مناهج الثانوية العامة نهائي
يجي الطالب يشوف الامتحان يلاقي تعبه وجريه طول السنه هو وابوه راح على الفاضي والامتحان ما مر عليهم في اي كتاب ولا اخدوه في اي درس من الدروس اللي بيجروا عليها طول السنتين اللي فاتو
يصابوا الاولاد باحباط والدنيا تنسد في وجوهم وتحصل الفواجع اللي بنسمع عنها كل عام من انتحار وهبوط مفاجئ في الدورة الدمويه وغيره من توابع الثانوية العامة
اما اللي بيساعده الحظ ويقف بجانبه ويحصل على اعلى الدرجات ويدخل كليات القمة وبرضه اهله تشوف الويل في تعليمه الى ان يحصل على شهادة التخرج تفتكروا بيحصل على وظيفه او بيلاقي عمل يكافئ به مشواره الطويل ومحاربته وجهادة في سبيل العلم وجهاد اهله هل له مقابل
للاسف بيتخرج وياخد الشهادة ويبروزها ويعلقها في حجرة الصالون المدهب علشان الضيوف تعرف ان فلاف الفلاني حاصل على بكالوروس او ليسانس
وبيشتغل سواااااق توكتك
يامن يهمه الامر نظرة بعين الرحمة للاباء والابناء وياريت نقضي على بعبع الثانوية العامة
……. ياعينـي عليــــــا……
#بقلم_حنان_محمدعبدالعزيز