بيت الأدباء والشعراء

في حبك يا مصر

#رباعيات_فى_حبك_يامصر
*****
مين ده إللى يقدر يحارب أو يزعل مصر
وصوت رجالها ونسائها بيزلزل حيطان القصر
أرض الخير وأمن وأمان وجنودها حراسها
بإدين ولادها بتبنى وتعمر وبتهزم الشر
*****
أنا مصر ساعة الجد جنودى ميت مليون
و عشان عيونى يضحو وكل حاجه تهون
إقرا التاريخ تلقانى منوره كل العصور
بصد الأعادى وانحيازى لولادى مهما يكون
*****
يا مصر ومهما تعملى فيا بعيش ع الحلوه والمره
وقت الشده صابر وراضى وبغمس لقمتى بدقه
فى الحرب تلقينى سيفك ودرعك وسهم يصيب عدوينك
ولو تطلبى روحى أقدمها ولاعمرى هتردد فى مره
*****
يا مصر إن مت أو جار عليا الزمن ياريت تذكرينى
أنا عشت طول عمري أعشقك وأفديكى بعمرى وسنينى
افتكرى إللى وقت الجد قدم حياته وكفنه بين إيديه
إحكى لولادك عنى وعرفيهم كل حاجه وأوعاكى تنسينى
*****
مصر المناره وأم الحضاره وعايشه بقلوبنا وعنينا
جامع بيحضن كنيسه المسلم والمسيحى ومصيرنا بإدينا
مهد أديان إنجيل وقرآن وف رباط ليوم الدين
مهما حاولو يفرقونا بمكرهم والله مايخيل علينا
*****
مصر بشعبها وجيشها واعيه وأقوى من أى إنتهازى
مصر جوه القلب ساكنه واكبر م المناصب والكراسي
عشق نيل وأرض طاهره وورد فتح فى الجناين
مصر دم جنود وشهده هيه باقيه وكلو ماشى
…..وعجبى
*****
#الشاعر_وليدالمصرى

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: