بيت الأدباء والشعراء

البنت ثورة

أحمد الصاوي

( ؛ ؛ ؛ البنت ثورة ؛ ؛ ؛ )

بيقولوا ثورة اجوزت
م الواد كفاح
جابوا البنين ويّا البنات
بعد السفاح
مأذونّا صوّر راح شهد
كمان مراسم للْنباح
كان فيلمُه صوره
مسبّكه من اللي فات
فى يوم وراح
الله أكبر ع اللي راح
صُعُب علينا
والحقيقه انُه استراح
من الوجوه اللي العفن
يدّارىَ منهم وانصدم
بعد اْمّ لاح
كُل الوجوه اتكَشِّفت
كل الوعود اتأجلِت
طِلع نهارنا الوعد ساح
حتى اللي نادى
واللي سيّح
غار بعيد دا غبره
تاخدُه منين مراح
قال ثورة تاني
اجوزت م الواد كفاح
حتى الفرح
شالُه الحبايب
والجيران كدا بارتياح
والواد يناير راح بكى
إبعد كفايه
بلاش نواح
إذا كان دا شعبي
عايز كدا يبقى انتا تبكي
تنوح لِنا
خلينا عايشين ياد كدا
بلاش تقلب فى اللي راح
دا وجعنا ياد قدّ البراح
جروح يا عيني وتتسع
ويضيق لنا حتى البراح
دا لو صحيح فاضل براح
خُدني معاك فى سكتك
لو حتى ممكن
ع الجِناح
نلمس دي ثوره
حنيّنه كنست بلادي
م المسا لحد الصباح
من الشرور ويّا الديون
دا ثوره كانت فى انفتاح
حتى العمار زي الرياح !
إحمد يا أُسطى ربنا
إحمد يا عامل
دا الهنا عمّال يزغرط
فى انشراح
إوعك تقول السعر زاد
إديني كتفك للبلاد
لازم نشلها كلنا
دا النعش ياد على اربعه
إجمد وشيل يلّا المُتاح
خليك حسيس
بُص لبصيص من الأمل
فى يوم ميصحّى يفوق لنا
ينادي لينا كلنا
فلاح وبنّا واللي ناح
ويقول سماح
إنسوا اللي
كان فى يوم هنا
دا كان كابوس والصبر زاح
تلاتين فى يونيه
وابتدا عصر الفَلَاح
الله يا عيني ع الفلاح !
عدينا فقر وباكتساح
مين هنا ينكر كدا
غير أهل شرّ بيكرهوا
حتة نجاح !
بُص لشَمَالها وشرقها
حتى جنوبها لغربها
كل الحياه اتغيرت
وبصوره أوضح فى الصلاح
من يوم ما ثوره اجوزت
م الواد كفاح !
…….. …. … .. .
أحمد الصاوي مصر ١٢ / ٧ / ٢٠٢٠

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: