بيت الأدباء والشعراء

نجمة عاشقة

بقلم سنا الشرق

نجمة عاشقة
في لحظة سمر
ف ليلة صيف
مالت نجمة عاشقة
على كتف بدر السما
قالت له عشقك كيف ؟
قال عشقي ليكي
فنجان قهوة لصاحب كيف
و نسمة هوا في عز الصيف
وكرم حاتم لو جاه ضيف
عشقي ليكي
عدد ذرات رماد الكرم
وعدد حجارة الهرم
وعدد كل نقطة ميه
في بحر النيل
وعدد كل خطوة وميل
على سطح الأرض
وكل حدود الكون
بالطول والعرض
وكد موج البحر
وكد مافيه من
الأصداف
وكد السمك بألوانه
والأصناف
وكد جزر و مد
وعدد كل نقطة مية جوا البحر
وكل نقطة دم……ف يوم النحر
بحبك عدد كل حبة قمح في الغيطان
وعدد كل ذرة رمل
ف ١٠٠ فدان
بحبك عدد كل الحروف
في كل القصايد
وكل الكتب
المجهول منها والمعروف
وعدد كل من لبى وطاف
من أول وجود الكون
وعلى كل المذاهب
شافعية. مالكية حنابلة وأحناف
بحبك والحب ده عباده لرب الكون
وليكي أجمل عادة ياتاج الكون
بحبك والكلام………..أيش يكون
دم الوريد……………ليكي يهون
وأنت أجمل ليلى وأنا المجنون
ومهما أقول فيكي ما وفيت
نظرة رمش من عينك
ولالمحة من جمال زينك
بحبك وحبك بداية ونهاية
وليلة حب وياكي
تحكيها شهر زاد في ألف حكاية
و شهريار يسمع ويجيب لعمره ألف عمر
ويقول لمسرور كده كفاية
بأمر سلطان الهوى
أمير مولاك
أكسر السيف يا مسرور
كفاية غرور
سلمت أنا ..رفعت الراية
أقول كمان ولا كفاية
خايف احكي يسرقني العمر
والاقي نفسي تهت ف الأوصاف
ويوم الحشر ألاقي نفسي في الأعراف
عشان يا حبيبتي قصرت
وياكي في الإنصاف
سنا الشرق

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: