لون عبتواب

(( لون عبتواب )))

**************

ابتدا وطواط الأفكار

يرمح فى دماغه

هتجوز مين ؟ ومنين ؟

وبكام ؟ طب فين ؟

وف عز ما بدأت ترقص فرحه

فى عين عبتواب

كان بيزور قباض الأرواح الحاجه بهيجه

الحاجه بهيجه خلاص

ماتت

****

وابتدا نور الفرح يموت فى عيون عبتواب

الليل بقى زى السجَّان

لا تحس بنور على بابه

ولا شامم ريحة انسان

واللى يبص فى عين عبتواب

هيحس بطعم القهر

***

عبتواب

بقى زى غريبه فى وسط الزرع

زى اما يكون فيه تار

بين عبتواب والحزن

لا الحزن بفارق عبتواب

ولا عبتواب عارف يهرب منه

صدمات ورا بعض

زى الزلزال وتوابعه

***

مش قادر اسيب عبتواب فى المحنه

وسألته

مالك يا سى عبتواب

ولا حاجه يا صاحبى

ولا حاجه ازاى

اذا كان الحزن اللى فى عينك

يكفى البشريه

والهم اللى مسطر فى جبينك

يصبغ أوطان

حِجْر الدنيا يا صاحبى ما عدش سايعنى

نفسى اتنفس

حاسس

جدران الكون بتضم على ضلوعى

ولا عاد لى أمل فى الدنيا

ولا عاد فى القلب مكان للنور

من أول ما وعيت للدنيا

وعرفت العناوين

أسود من قرن الخروب

*****

فـيـصـل بـــدر