بيت الأدباء والشعراء

سامحيني

سامحتينى
نص جديد

محاولة جديدة للكتابة بطريقة مختلفة عن كتاباتى السابقة أرجو أن أكون وفقت فى كتابة نص جيد بما يعبر عن إحساسى والكثيرون ممن يشعرون بنفس المشاعر وأرحب بكل نقد بناء وتوجيه من أساتذتى الكرام
دمتم بحفظ الله
…………………..

سامحتينى

أنا اللى زمان كتبت كلمتين ليكى

فى حلم العوده للأوطان

وكم مره شكيت همى من الأحزان

ومديت إيدى كام مره وانا عطشان

وقلت اسقينى من إيدك

خففى الأحزان

ولا مره سمعتينى

وسبتينى فى موج طاغى بلا شطآن

وانا اللى طول عمرى ….. وفى ليكى

وعمرى فى يوم ما خنت العشرة والأيام

وطول عمرى أردد كل يوم اسمك

ترانيم عشق وهيام

يا ساكنه القلب والوجدان

أرتل اسمك المحبوب فى صلواتي

وأدعى لحفظك الرحمن

وأناجى طيفك الهايم

وانا صاحى وانا نايم

أقول يمكن يكون …. حملك كبير

وانا اللى عليكى متحامل !!!!

وحتى فى حزنى وف همى

الاقى القلب ليكى ….. مايل

فمهما تاخدنى أسفارى وترحالى

ومهما الغربه بتطول

وتقتل فينا كل جميل

الاقى روحى رايحالك

والاقى نبضى يدعيلك

وقلبى فى هواك يميل

ولا عمرى نسيت فضلك

كفايه فرحى فى حضنك

ولو حضنك فى يوم يطردنى م الجنه

هأكون جنبك

أنا فى قربك أحس السعد …. واتهنا

واعيش على وعد تنادينى

أسيب الدنيا وارجعلك

ما انا إبنك ….. فسامحينى

يجف الدمع فى عيونى

وارجع تانى

يجرى الدم فى عروقى

ونبض القلب يتنطط من الفرحه

واغزل م القمر طرحه

أمد ايديا وأناديلك

واشوف البسمه فى عيونك

تقول إنك ….

سامحتينى ….

بقلمى
ايمن ابو الدنيا
٢٨/ ٣ / ٢٠٢٠

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
%d مدونون معجبون بهذه: