(((* نَادره *)))

مِش غِنوه وموال

ولا أىّ حكايه هتِخْطُر على بال

ولا حتى قصيدة شِعر

ولا أى كلام يتقال

نادره دِى حاله

وعشان تتكرر

ألف استحاله

هو بعد الأم ينفع

فيه قِـواله

نادر أما اتولدت

مكانتش بتصرخ زى الأطفال

ولا كانت ملهوفه على الثدى

زى أما تكون عارفه نهاية المشوار

حَطْة إيدِك على خَدْك

يا امَّـه بتِوجعنى

وانا لو علِّـيت البُكا والنُوح

مين غيرك يا امّـه هيسْمعنى ؟

إوعِيك تفتكرى ان الصلا والصوم

من غير ما هترضِى عليّه هينفعنى

معقول العمر هيجرى يا نادره

واحنا بعاد ؟

معقول الموت

يسرق مِنّنَا حد

من غير أى ميعاد ؟

خايف يا امه الغربه تاخدنى

وانسى وما ارجعش

وتغيب عنك كل الأخبار

استنى يا حبة عينى رجوعى

انا ها ارجع لو زاد الجرح

وان زاد جوعى

ها ارجع

لو سكن اليأس مشاعرى

والصمت استوْطَنْ فى ضلوعى

ها ارجع

لو زاد الحزن فى قلبى

وان غطت أحلامى دموعى

انا راجع يا امه

راجع

رغم الحزن الساكن فى القلب

راجع

رغم القهر ورغم سكوتى

استنى اما ارجع يا امه

إوعى تموتى

****

أصل الصوت

لما يكون مبحوح

والقلب كمان بيكون مجروح

والعمرعلى جبال الغربه

حزين مدبوح

والفرحه بعيده

وشريده *** ووحيده

وحقيقة الحلم سراب

يبقى النور اللى فى قلب العين

كداب

ليه يا امه النور مكبوت

ليه الليل حالف ما يفوت

كل دا يا امه سكون وسكوت

ولا انتى يانور عينى

ناويه على الموت

خلاص يا امه

نهيتى الرحله بالترحال

وهتنسينى فى الغربه

كدا رحَّـال

ورب الكعبه يا امايه

موتك ما خطر عــ البال

*****

فيصل بدر