+هو أنا ممكن أسأل حضرتك سؤال

+هو أنا ممكن أسأل حضرتك سؤال
_أه أوي أوي إتفضل
+هو إنت ليه ديماً كده
_كده إزاي يعني
+يعني ديماً حزين زعلان
شايل هموم وديماً ساكت
مابتتكلمش مع حد خالص
مابتحكيش لحد عن اللي جواك
وديماً مبين عكس اللي جواك
بتسمع لكل الناس
ومابتحكيش لحد عن حاجه مضيقاك
_هههههههه كده أحسن
+هو إيه بس اللي أحسن
_اللي أنا فيه ده
يعني أسمع لكل الناس
وما أحكيش لحد عن حاجه
+طيب ليه؟؟؟
ما تحكي وتفضفض وتخرج الكبت
والهم اللي جواك علي الاقل
ما تكبرش قبل آوانك
اتعلم من الناس اللي بتتكلم معاك
وأتكلم وفضفض
_أولاً الشكوي لغير الله مذله
وثانياً الناس مافيش في إيدها حاجه
الخير والشر بيد الله سبحانه وتعالى
وثالثاً يمكن ربنا باعتني للناس دي
علشان أكون سبب
في اي حاجه حلوه بتحصلهم
أو اكون راحه نفسيه ليهم
بعد ما يحكولي اللي جواهم
وبعدين إحنا ربنا خالق لنا ودنين ولسان واحد
علشان نسمع أكتر مانتكلم
وأنا بطبيعتي ما بحبش
أتكلم عن حياتي ومشاكلي
ومابحبش أشيل حد همومي
كل واحد فيه اللي مكفيه
+طيب ما انت برضوا فيك اللي مكفيك وزيادة
ومع ذالك بتسمعلهم كلهم
وعمرك ما قُلت لحد لاء
ولا عمرك صديت حد في كلامه
بتسمع وتواسي وتنصح
_(لا يكلف الله نفسا إلا وسعها)
وأنا قولتلك يمكن ربنا باعتني للناس دي
علشان أكون سبب لراحتهم
ولو ربنا سبحانه وتعالى
مش عارف إني هكون قد
اللي بيكلفني بيه ماكنش كلفني بيه
وبعدين مش كل الناس زيي
بتسمع وتواسي وتنصح
وتتحمل وتكتم جواها
أغلب الناس بتسمع منك
علشان تعرف حياتك وحقيقتك
علشان يبقي ليك نقطة ضعف تحت إديهم
يعرفوا يزلوك بيها في أي وقت
إلا ما رحم ربي طبعاً
وبعدين سرك سر مابين تلاته
ربك وقلبك وعقلك
ولو خرج من بين دول
مايبقاش سر بقي خبر
وبعدين تعالي هنا قولي هو انت تعرفني
+آه أعرفك كويس جداً
_إنت مين
+أنا نفسك
(((..مصطفى دسوقي..)))

أعجبني