اصعب. الحكايه

قصيدة بعنوان……. أصعب حكايه

من فوق حدود الصبر
فارد همتى
ماشى الطريق
مظلوم برئ
مجروح بألملم ف الورق
حبة مشاعر ف الغرق
على حلم كان
مني إتسرق
وسط الطريق
وف أخر الركن البعيد
بأكتب وأعيد
كل المعانى قريبه
والدم سارح ف الوريد
عمال بيغلى م الألم
وأكتب وأزيد
والسطر من كتر البكا
مبقاش وحيد
كل الحروف بتونسه
كيف الوليد
وأزاى أقول عن
لمس إيد حضنا البعيد
كنت أما أشوفها
أفرح لها
وكأنه عيد
ما أنا كنت ليها
حضن وافى
من زادى بأرسم سكتى
وأصلب كتافى
ولا كنت عارف
يعنى إيه معنى الندم
وكأن حبى م اترسم
إحساس جديد
فجأة السكوت
غطى المكان
ضاع الحنان
غاب الأمان
طالع على
خشب الحنين
هأحكى حكاية من زمن
موشومه فوق خد السنين
كان الطريق
صعب وغريق
وأدينى بأدفع التمن
واقف على مسرح سبق
بأغزل خيوط
وأحكى وأفوت
لحظة صمود الحبر
فى حضور القلم
كل السنين جوه الشاشات
عدت ساعات
من يوم ميلاد
الفرح ف أحضان الامل
حتى اللى مات
وقت السكات
شاف الدموع
طفى الشموع
رفض الخضوع
أصبح وليد
وكأنه بدر من البدور
فارد شعاعه وإكتمل
الدمع نازل ع الرموش
مبحسهوش
والرؤية مش واضحه
يادوب شايف رتوش
أصعب حكايه هتتحكى
عن حلم كان ومعشتهوش
كان قلبى رافض للخداع
ومكانش حمل الإمتناع
صدق بطيبه بسمته ومكدبوش
ولاقيته عايش فرحته
مع كل بسمه بتتولد
فوف الشفايف
ومكانش خايف
يوم يجرحه وميرحموش
كان زى طير
عمال يطير
هيمان وعايش نشوته
ومخاونوش
الفيلم لسه بيتحكى
والدمع ساكن
ع الرموش
والوقت عدى
من زمان
والصمت راجع للمكان
وروايتى لسه
مكافتوش
أطفوا خلاص
كل اللى فات
أطفوا كمان
كل الشاشات
كل اللى عدى
ذكرايات
فى ماضى كان
ما أختارتهوش
مكتوبه قصه
للى خان
موجوده على مر الزمان
إنى خلاص
مابحبهوش

كلمات الشاعر محمد ثروت